Ana bətnində olan uşağın xəstəliyini riskli analizlər olmadan müəyyən etmək mümkün olacaq-Fotolent

Bölmə: Sosial › ,
Tarix: 15:00 14.04.2017

Ailə quran hər bir qadın dünyaya sağlam övlad gətirmək istəyir. Hamilələik dövründə ana və övladın sağlamlığı isə həm həkimləri, həm də qadınları maraqlandıran vacib məsələdir.

Informator.az xəbər verir ki, Bu dövrdə müayinədən keçən zaman bəzi testlər uşaq üçün riskli ola bilir. Həkimlər qadın hamilə olan zaman müntəzəm həkim-ginekoloqun nəzarətində olmağı, müxtəlif analizlərdən keçməyi məsləhət görürlər. Bu həm körpənin, həm də ananın sağlamlığı üçün ən vacib şərtdir. Hazırda Azərbaycanda ana bətnindəki döllə bağlı hər hansı narahatlıq olduqda ananın bətninə iynə batırılır və döldən nümunə götürülür. Perinatal diaqnostikada yeni texnologiyalar” layihəsinin təqdimatına həsr olunan Azərbaycan və Türkiyə həkimlərinin birgə konfransında Türkiyənin Genetik Xəstəliklərin Diaqnostikası Mərkəzinin (GENOKS) Azərbaycan üzrə rəsmi təmsilçisi Ersadik Turan bildirib ki, amma bunun bəzi riskləri var. Uşağın düşmə, infeksiya keçmə riski var.

E.Turan deyib ki, irsi xəstəliklərin yeni diaqnostikası NİFTY testi vasitəsilə aparılacaq. Bu test 19 genetik parametr üzrə genetik xəstəliyi analiz etməyə imkan verir: "Bu zaman ananın venasından qan götürülür, döllə ananın qanı tutuşdurulur və uşağın xromosomlarına baxılır. Nətəcidə də müəyyən edilir ki, dölün hər hansı sıxıntısı var, ya yox".

O bildirib ki, NİFTY uşaqda genetik riskləri təyin edən, etibarlı, sürətli və maksimum müsbət faizə sahib olan testdir. Perinatal diaqnostika əsasən doğulmamış döldəki irsi xəstəlikləri və inkişaf qüsurlarını müəyyənləşdirir, nəticədə dünyaya daha sağlam uşaqlar gəlir.

E.Turan qeyd edib ki, hazırda ana bətnindəki döldə olan bəzi irsi xəstəliklərin müəyyənləşdirilməsi üçün anadan götürülən nümunələr xaricə göndərilir və test orada həyata keçirilir. Amma bu yeni texnologiya həmin xəstəliklər üzrə də müayinələrin ölkədə aparılmasına imkan verəcək.