Kibercinayət əməliyyatında 198 şübhəli saxlanılıb

Türkiyə üzrə 19 vilayətdə aparılan kibercinayət əməliyyatlarında uşaq istismarı, qanunsuz mərc və dələduzluq kimi cinayətlərə qarışan 198 nəfər saxlanılıb.

Daxili İşlər Nazirliyi kibercinayətlərlə mübarizə çərçivəsində keçirilən əməliyyatların nəticələrini açıqlayıb. Nazirliyin məlumatına görə, son 10 gün ərzində keçirilən əməliyyatlarda 198 nəfər həbs edilib, ümumilikdə 189 milyon 87 min TL dəyərində pul və əmlaka əl qoyulub. Nazirlik rəsmiləri əməliyyatların 19 vilayətdə aparıldığını və şübhəlilərin müxtəlif cinayətlərdə məsuliyyət daşıdıqlarını bildiriblər. Əməliyyatlar zamanı uşaq istismarına aid pornoqrafik görüntülərə sahib şəxslər, qanunsuz mərc və qumar fəaliyyəti ilə məşğul olanlar, eləcə də dələduzluqla vətəndaşları aldadan şəxslər yaxalanıb. Bəzi şübhəlilərin mobil bank hesablarına icazəsiz daxil olaraq qanunsuz gəlir əldə etdikləri də müəyyən olunub.

Daxili İşlər naziri Ali Yerlikaya əməliyyatlara rəhbərlik edən valiləri, Respublika Baş Prokurorluqlarını, Daxili İşlər Nazirliyi Baş İdarəsi Kibercinayətlərlə Mübarizə Şöbəsini, vilayət polis idarələrini, polis qruplarını və MASAK əməkdaşlarını təbrik edərək bildirib:

“Kibercinayətlərlə mübarizəyə qətiyyətlə davam edirik”.

Mənbə:HaberX

Gövhər Qafarova