Sülh danışıqları davam etdiyi bir vaxtda Rusiyada ardıcıl ikinci gün avtomobil partlayışı baş verib

Cümə günü səhər saatlarında Moskvada avtomobilin partladılması nəticəsində Ukraynanın Rusiyaya qaçmış keçmiş baş naziri Nikolay Azarovun sabiq müşaviri Sergey Zavorotnı ağır yaralanaraq xəstəxanaya yerləşdirilib. Bu, cümə axşamı Sankt-Peterburqda rusiyalı polkovnikin həlak olduğu partlayışdan sonra Rusiyada ardıcıl ikinci gün Kremlpərəst şəxsləri hədəf alan analoji hücumdur.
Hadisələrlə paralel olaraq gecə ərzində Rusiya və Ukrayna qarşılıqlı zərbələri davam etdiriblər. Rusiyanın bombardmanı nəticəsində Ukraynada bir xəstəxana vurulub, Odessa və Zaporojyedə biri 17 yaşlı yeniyetmə olmaqla 3 nəfər həlak olub. Ukraynanın cavab zərbələri nəticəsində isə Rusiyanın Samara və Volqoqrad vilayətlərindəki sənaye obyektlərində ümumilikdə 8 nəfər, sərhədyanı Bryanskda isə 1 nəfər ölüb.
Hərbi gərginliyə baxmayaraq, Dublindəki hərbi aviabazada ABŞ elçiləri Cared Kuşner və Stiv Uitkoffun iştirakı ilə qeyri-rəsmi sülh danışıqları keçirilir. Kuşner bildirib ki, Putin sülh prosesində Avropanın töhfəsini qəbul etməyə hazırdır və Ukrayna Prezidenti Volodimir Zelenski bu addımı alqışlayıb. İrlandiyanın Baş naziri Mixol Martin prosesdə Böyük Britaniyanın da rol oynamasının vacibliyini vurğulasa da, danışıqların təxirə salınması səbəbindən Britaniyanın milli təhlükəsizlik müşaviri Conatan Pauellin görüşlərə qatılması baş tutmayıb.

Səkinə Musayeva

Mənbə:BBC