Yağıntı zərərinin məsuliyyətini kim daşıyır?

Paytaxtda son günlər müşahidə olunan intensiv yağıntılar bir daha göstərir ki, təbii hadisələr təkcə müvəqqəti narahatlıq yaratmır, eyni zamanda , ciddi maddi zərərlərə də səbəb olur. Su basması nəticəsində çökmüş yaşayış evləri, dağıntılar altında qalan maşınlar və infrastrukturda yaranan dağıntılar vətəndaşları düşündürən əsas sualı gündəmə gətirir: Bu zərərlərin məsuliyyətini kim daşıyır?

Mövzu ilə bağlı sığorta eksperti Şahin İsmayılov “İnformator.az”a açıqlamasında bildirib ki, insanlar sığortaya maraq göstərmir, hadisə olduqda isə ödəniş olunmasını tələb edirlər:

“Qanunvericiliyə görə, fövqəladə hallarda dövlətin müvafiq qurumları zərərin aradan qaldırılması üçün tədbirlər görməlidirlər. Bununla yanaşı, sığorta mexanizmlərinin gücləndirilməsi, əhalinin risklərdən qorunması daha geniş tətbiq olunmalıdır”.

Ekspertin sözlərinə görə, vətəndaşlar daşınar və daşınmaz əmlaklarını vaxtında sığorta etdirməlidirlər:

“Sığorta şirkətlərinin məsuliyyəti artırılmalı, vətəndaşların hüquqları tam qorunmalıdır. Eyni zamanda, vətəndaşlar da məsuliyyətli olmalı, öz daşınar və daşınmaz əmlaklarını vaxtında sığortalatmalıdırlar. Praktikada isə bunun əksini görürük.İnsanlar sığortaya maraq göstərmir, hadisə olduqda isə ödəniş olunmasını tələb edirlər. Təəssüf ki, mexanizm belə işləmir”.

Sonda isə ekspert vətəndaşlara müraciət edib:

“Sığortalı həyat ən rahat həyatdır. Hadisə bir dəfə olur, fəsadları isə böyük olur. Vaxtında əmlaklarınızı sığortalayın”.

Zəri Bayramlı