Almaniyanın dövlət borcu 2 trilyondan artıqdır

Bölmə: İqtisadiyyat › ,
Tarix: 21:02 03.04.2025

Almaniyanın dövlət borcu keçən il 63.9 milyard avro artaraq 2.509 trilyon avroya çatıb.

 

Almaniya Federal Statistika İdarəsinin (Destatis) ilkin məlumatına görə, ölkənin federal, əyalət, sosial təminat fondları, bələdiyyələr və bələdiyyə assosiasiyaları daxil olmaqla bütün əsas və əlavə büdcələri nəzərə alındıqda, ümumi dövlət borcu keçən il 63.9 milyard avro artıb. Borc 2023-cü ilin sonu ilə müqayisədə 2.6 faiz artaraq 2 trilyon 509 milyard avroya çatıb.

 

Sözügedən dövrdə federal borc 36.5 milyard avro artıb. Əyalətlərin borcu isə 12.7 milyard avro (2.1 faiz) artaraq 606.9 milyard avroya yüksəlib.

 

Destatisin məlumatında bildirilib ki, Covid-19 pandemiyası zamanı şirkətlərə dəstək məqsədilə yaradılmış İqtisadi Sabitləşdirmə Fondunun (WSF) borcları 40.2 faiz azalaraq 22.1 milyard avroya enib. "Almaniya Silahlı Qüvvələrinin Xüsusi Fondu"nun (Bundeswehr) borcu həmin dövrdə 295.6 faiz (17.2 milyard avro) artaraq 23 milyard avroya çatıb.

 

Rusiya-Ukrayna müharibəsinin davam etdiyi dövrdə Almaniya hökuməti alman ordusunun şəxsi heyət, texnika və infrastruktur baxımından əhəmiyyətli modernizasiya ehtiyacını ödəmək üçün 100 milyard avro dəyərində xüsusi fond ayırıb.

 

Mənbə: A Haber

Səyyarə Mirzəyeva