"Azərbaycan - İran münasibətləri yeni bir mərhələyə daxil olur"

Bölmə: İqtisadiyyat › ,
Tarix: 19:37 03.04.2025

Son aylar ərzində Azərbaycan-İran münasibətlərində yeni dinamika, müsbət inkişaf özünü göstərməkdədir. İkitərəfli münasibətlərdə xeyli müddət idi ki, davam edən soyuqluq aradan qalxıb. Bunu yüksək səviyyəli qarşılıqlı səfərlər, verilən bəyanatlar da nümayiş etdirir.

 

Mövzu ilə bağlı “informator.az”a açıqlamasında iqtisadçı Pərviz Heydərov bildirir ki, ölkəmiz ilə İran arasında münasibətlərin dərin tarixi kökləri vardır:

 

“Azərbaycan müstəqillik əldə etdikdən sonra münasibətlərimiz açıq şəraitə keçmiş və biz öz tərəfimizdən qarşılıqlı əlaqələrin daima inkişaf etməsi tərəfdarı olmuş, bunu durmadan inkişaf etdirməyə çalışmışıq. Təəssüf ki, əks tərəf müəyyən zaman çərçivələrində, yəni ara-sıra buna heç də adekvat olmayan, uyğun gəlməyən addımlar atıb. Lakin buna rəğmən, əlaqələrimiz demək olar həmişə inkişafda olub. Bu gün Azərbaycan və İran arasında bir çox sahələrdə əməkdaşlıq mövcuddur. Bura daxildir, iqtisadi-ticarət, nəqliyyat, energetika və digər sahələr... Enerji sahəsində əməkdaşlıq xüsusən diqqətəlayiqdir. Eyni zamanda, nəqliyyat-logistika sahəsində əməkdaşlıq da nəinki iki ölkə üçün, bütün region üçün əhəmiyyətli xarakter daşıyır. Bunları inkişaf etdirməklə, dərinləşdirmək və genişləndirməklə çox şeylərə nail olmaq mümkündür. Buna nail olunsa və ümumiyyətlə, bütün ortaq maraqları nəzərə almaqla bundan sonra hələ çoxlu sahələrdə yeni-yeni sazişlər imzalamaq mümkündür. Əsas odur ki, siyasi ambisiyalara uymaq aradan götürülsün, pis niyyətlərə uyğun yanaşma sindromu ləğv olunsun”.

Aysel Mirzəyeva