Müəllim hazırlığının keyfiyyəti necə yüksəldilə bilər?-Ekspertdən AÇIQLAMA

Bölmə: Sosial › ,
Tarix: 23:45 15.12.2023

Dövlət İmtahan Mərkəzinin  Direktorlar Şurasının sədri Məleykə Abbaszadə Azərbaycan müəllimlərinin XVI Qurultayında çıxışı zamanı bildirib ki, müəllim hazırlığının keyfiyyətini yüksəltmədən, təhsilin məzmununu yeniləmədən, təlim metodlarını təkmilləşdirmədən, qabaqcıl beynəlxalq təcrübəni öyrənib tətbiq etmədən təhsil sahəsində inkişafa nail olmaq mümkün deyil.

Hansı metodları nəzərdə tutulur?

Müəllim hazırlığının keyfiyyəti necə yüksəldilə bilər?

Beynəlxalq təcrübə nəyə əsaslanır?

İnformator.az-a açıqlama edən təhsil eksperti Elçin Əfəndi Məleykə Abbaszadənin fikirləri ilə razı olduğunu qeyd edib.

 

" Çünki biz   nə qədər peşəkar müəllim hazırlayarıqsa, təhsilin keyfiyyəti də o qədər yüksələr, dünyanın hər bir ölkəsində bu belədir.
Qeyd edim ki, müvafiq olaraq, təhsil sahəsində, xüsusilə, ümumi orta təhsildə  hal-hazırda tətbiq etdiyimiz kurikulum, rəqəmsal inkişaf və s metodları var, bunların hər birinin araşdırılaraq tətbiq olunması  məqsədəuyğundur.
Əlbəttə, belə olduğu halda bu tətbiq etmələr vahid, milli bir kurikulumun yaranmasına səbəb olacaq, bunun üçün müəyyən qədər zaman lazımdır".

 

Ekspert bildirib ki, müəllim hazırlığının keyfiyyətini yüksəltmək üçün müəllimlər müasir çağırışlara cavab verməlidir, eyni zamanda onların təkmilləşməsinə , vahid standartlar əsasında bilik və bacarıqların formalaşmasına təkan verilməlidir.

 

"Təbii ki, müəllimdən də çox məqam asılıdır. Onlar özlərini inkişaf etdirməldirlər. Xüsusilə, informasiyanın inkişaf etdiyi dövrdə müəllimlərdən bu sahədə müvafiq biliklər tələb olunur. Hal-hazırda smart lövhələrdən, texnologiyadan istifadə olunursa, təbii ki, burada kadr seçimi düzgün olmalıdır".

 

Elçin Əfəndi əlavə edib ki, kadrların da hazırlanması üçün  isə ilk növbədə ali təhsil müəssisələrini inkişaf etdirməli, müəllimlərin təlimə cəlb olunmalıdır.



"Beynəlxalq təcrübədə də dediklərimin əsasında kadrların hazırlanması həyata keçirilir və qabaqcıl təhsil, standartlarının, strategiyalarının  tətbiqinə üstünlük verilir. Düşünürəm ki, zamanla bizdə də eyni proses həyata keçiriləcək.
Dövlət olaraq təkcə təhsil sferasında yox, digər sferalarda da 30, 40 il lazımdır ki, özümüz vahid sistem yaradaq və bu sistem üzərindən inkişafımızı bərqərar edək, əlbəttə, bunların başında təhsil dayanır".



Təhsil nə qədər inkişaf edərsə, digər istiqamətlərə də öz təsirini göstərə bilər- deyə ekspert fikirlərini tamamlayıb.

Nəzrin Mirzəyeva