"Heydər Əliyev adına təqaüd"çü-Sibel Əsgərova

Bölmə: Sosial › ,
Tarix: 20:39 19.12.2023

"İnformator.az"ın növbəti müsahibi "Heydər Əliyev adına təqaüd" mükafatçısı, Bakı Dövlət Tətbiqi-riyaziyyat və kibernetika fakultəsinin tədris ingilis dilində kompüter elmləri ixtisasının tələbəsi Sibel Əsgərovadır.

Sibel Əsgərova kimdir?

Mən, Sibel Əsgərova. 22 oktyabr 2005-ci ildə Bakı şəhərində anadan olmuşam. 2022-ci ildə Şəki şəhər fizika-riyaziyyat və humanitar təmayüllü liseyin 11-ci sinfini bitirib, 645 balla Bakı Dövlət Universiteti Tətbiqi-riyaziyyat və kibernetika fakultəsinin tədris ingilis dilində kompüter elmləri ixtisası üzrə qəbul oldum. Hal-hazırda 2-ci kurs tələbəsiyəm.

Məktəbdə təhsil aldığım müddətdə bir çox yarış, olimpiadalarda fəal iştirakım olub. 9-cu sinifdə təhsil alarkən "Sabahın Alimləri" IX Respublika müsabiqəsində riyaziyyat nominasiyası üzrə 3-cü yerə layiq görülüb, bürünc medal ilə təltif olundum. Eyni zamanda Təhsil naziri Emin Əmrullayevin əmri ilə 2022-ci ildə "qızıl nişan"a layiq görüldüm.

"Heydər Əliyev adına təqaüd" ən yüksək ortalaması olan 100 tələbəyə verilib. Ümumi orta müvəffəqiyyət göstəricim(ÜOMG) 96.03- dür. Ümummilli liderimizin məzun olduğu universitetin tələbəsi olaraq bu təqaüdü qazanmaq mənim üçün böyük fəxrdir.

Qazandığınız mükafatı nəyə xərcləməyi düşünürsünüz?

Qazandığım mükafatı gələcək təhsilim üçün xərcləməyi düşünürəm.

Ümumiyyətlə, həvəslə çalışsaq, mütləq bir nəticəsini görəcəyimizə inanıram. Bu inancım məni hədəflərim üçün daha çox səy ilə çalışmağa və uğur qazanmağa təşviq edir. Oxuduğum universitet də, ixtisas da arzusunda olduğum,xəyalını qurduğum seçimlər idi. Bunların da mənim uğur qazanmağıma səbəb olan amillərdən olduğunu düşünürəm.

Təqaüd qazanmaq xəbərini necə aldınız?

Təqaüdü qazanmağım xəbərini fakültəmizin dekan müavini Abbas Mehdiyevdən aldım. Bu xəbəri aldığımda yaşadığım sevincin həddi-hüdudu yox idi. Eyni zamanda 16 dekabr tarixində keçiriləcək müəllimlərin 16-cı qurultayında iştirak etmək hüququnu da qazandığımı eşitdiyimdə çox böyük qürur hissi yaşadım.

Gələcək hədəfləriniz nələrdir?

Gələcək hədəflərim əsas olaraq təhsilimi davam etdirib,peşəmin sirlərini öyrənmək, Azərbaycanımızı layiqincə təmsil edə bilməkdir. 

Gənclərə demək istəyirəm ki, xəyallarınızın arxasınca gedin,hədəflərinizi müəyyən edin və bu hədəflər üçün bütün əməyinizi qoyun. İnanın ki, o halda uğur hər zaman sizinlə olacaq.

 

Asiman Hafizqızı