Seçimim Polşa oldu və düşünürəm ki, düzgün qərar verdim-Zahid Məmmədov

Bölmə: Sosial › ,
Tarix: 21:03 22.12.2023

"İnfomator.az" saytının "Xaricdə təhsil alan tələbələr" rubrikasının növbəti müsahibi Zahid Məmmədovdur.

Zahid Məmmədov kimdir?

Zahid Məmmədov 21 yaşım var, Sumqayıt şəhərində dünyaya gəlmişəm. 2019-2023 illərdə Bakı Dövlət Universiteti Tarix ixtisası üzrə təhsil alıb,buranı fərqlənmə diplomu ilə bitirdim. Hal-hazırda Polşanın Lublin şəhərində yerləşən Maria Curie-Sklodovska Universitetində Stefan Banach təqaüd programı ilə Beynəlxalq Münasibətlər üzrə tam təqaüdlü təhsil alıram. 

Proqram limitli sayda tələbə qəbul edir və sayı ildən-ilə dəyişir. Universitet ortalamam yaxşı olduğundan bu üstünlük idi. Müraciət edərkən hələ universitetin 4-cü kursunda təhsil alırdım, bu zaman ÜOMG 93 idi. 

Tələbəlik illərimdə sosial aktivliyim çox olub və ölkənin bir çox yerli təşkilatlarında könüllü idim. Mən burada müxtəlif sertifikatlar və uğurlar qazandım. Qeyri-hökumət təşkilatları və global təşkilatlarda iş təcrübəm də var. Bunlar hamısı mənə proqramı qazanmaqda çox kömək etdi. Həmçinin 1 tədqiqat mövzusu və 1 elmi məqaləm də var.

Proqram dil biliyi sertifikatı da tələb edir ki, bu da minimum B2 səviyyəsində olmalıdır. Mən müraciət edərkən 6.5 IELTS sertifikatına malik idim. Bir sözlə, bir tələbənin edə biləcəyi hər şey məndə mövcud idi.

Proqramın üstünlükləri nələrdir?

Proqram illik təhsil haqqından tələbəni azad edir, bu ancaq buradakı dövlət universitetində oxuduğunuz halda keçərlidir. İlkin gəliş pulu kimi 700 avro ödəyirlər və bunu transfer xərci kimi qəbul edə bilərsiniz. Aylıq 350 avro təqaüdlə də təmin edirlər ki, yaşamaq üçün kifayət qədər yaxşı məbləğdir. 

Xaricdə təhsil almağa necə qərar verdiniz? 

Xaricdə təhsil almaq fikri fərqli bir təcrübə yaşamaq istəyimdən irəli gəlir. Ölkə hududlarında edə biləcəklərimi əldə etdim və buna ehtiyacım var idi. 

1 il ərzində hamsını çatdırmağa çalışdım. Həm işlədim, həm təcrübə yığdım, həm də IELTS sertifikatına hazırlaşdım və universitet dərslərimlə də maraqlandım. Hətta bu dövrdə elmi məqalə yazdığım zaman 3 yerdə eyni anda könüllü idim. Təbii ki, bəzilərində onlayn iştirak etdiyim üçün vaxt böldüşdürə bilirdim.

Sonunda sənədlərimi topladım, proqrama müraciət etdim və avqust ayında təqaüd qalibi olduğum açıqlandı. Bundan əlavə, bəzi ölkələrdən də təqaüdlərim mövcud idi ki, İtaliya və s. seçim etməliydim. Seçimimi Polşa üçün etdim və düşünürəm ki, düzgün qərar verdim. Polşa gözəl və sakit bir ölkədir. 

Təhsil aldığınız ölkədə daha çox hansı problemlərlə qarşılaşırsınız?

Təhsil aldığım dövrdə pandemiya səbəbindən çox böyük çətinliklər yaşadım. Xaricdə müraciət etmək istədiyim qısa və orta müddətli layihələr var idi, pandemiya səbəbindən istirak edə bilmədim. Həm də digər işlər üçün bu keçirilən təcrübə şəraiti və s idi.

Gələcək planlarınız nələrdir?

Gələcək planlarıma gəldikdə, bunu hadisələr göstərəcək. Bu təcrübəmdən sonra anladım ki, planlardan əlavə düzgün zaman və addım anlayışı da mövcuddur ki, bu ancaq zamanla anlaşıla bilər.  

Ölkəmizdəki potensiallı tələbələrə gələcəkdə kömək olmaq, ölkəmiz üçün çalışmaq mənim uşaqlıq arzularımdandır. Bu amalla davam etmək istəyirəm. Təhsil və tədqiqat fəaliyyətim isə hər zaman davam edəcək.

Polşadakı həyatıma gəldikdə isə, problem yerli əhalinin ingilis dili bilməməsi, havanın tez qaralması və bəzi yerlərin çox tez bağlanmasıdır. Həftə sonunda çox yer işləmir və bu bir az çətin olur, amma zamanla alışmaq mümkündür. İnsanlar da yardımsevərdir, bunu mən xidmət və professor heyətindən də gördüm. 

Gənclərə tövsiyələriniz nələrdir?

Tələbələrə ixtisas seçərkən tövsiyəm, sevdiyiniz ixtisasa nail olun. Ətraf təsirlərə görə gələcək yönümlüdü deyib bir ixtisasa başlamayın. Sevib oxuyacağınız hər bir ixtisas sizə uğurlu gələcək vəd edir. Mən siyasi elmləri sevirəm, buna görə də bakalavr Tarix, magistr Beynəlxalq Münasibətlər üzrə təhsil alıram. Yenidən seçim hüququm olsaydı, yenə də bunları seçərdim.

Tələbələrə təklifim aktiv bir tələbə olun, dərslərlə kifayətlənməyin, layihələrdə iştirak edin, könüllü olun, təcrübə qazanın və dil biliklərinizi inkişaf etdirin. Bunlar hər istiqamətdə sizin karyeranıza böyük təsir göstərəcəkdir.

Asiman Hafizqızı