ABŞ iqtisadiyyatında mülayim artım

ABŞ Federal Ehtiyat Sistemi (Fed) ölkə iqtisadiyyatında son həftələrdə mülayim artım müşahidə olunduğunu açıqlayıb.

Fed ABŞ iqtisadiyyatının mövcud vəziyyətinə dair qiymətləndirmələrin yer aldığı “Bej Kitab” hesabatının sentyabr sayını yayımlayıb.

Hesabatda qeyd olunub ki, iqtisadi fəallıq iyulun əvvəlindən etibarən mülayim şəkildə artıb. 12 regiondan 10-u iqtisadiyyatın “yüngül və orta” tempdə böyüdüyünü bildirib, 2 regionda isə hər hansı dəyişiklik qeydə alınmayıb.

İstehlak xərclərinin ümumilikdə cüzi artdığı bildirilən hesabatda, istehsal fəaliyyətinin əksər regionlarda sürətləndiyi vurğulanıb.

Hesabatda qeyd olunub: “Növbəti aylara dair ümumi mənzərə müsbət olsa da, sektorlar üzrə gözləntilər fərqli olub. Rəyi soruşulan şəxslər yüksək enerji qiymətləri, həyata keçirilən siyasətlər və beynəlxalq münaqişələrin təsiri ilə bağlı qeyri-müəyyənliyin artdığını bildiriblər.”

Məşğulluğun ümumilikdə çox cüzi artdığına diqqət çəkilən hesabatda 3 regionda mülayim, 4 regionda isə yüngül artım qeydə alındığı, 5 regionda isə dəyişiklik olmadığı bildirilib.

Hesabatda regionların süni intellektin əmək bazarına tələbat baxımından həm müsbət, həm də mənfi təsirlərinin olduğunu qeyd etdiyi vurğulanıb.

Qiymətlərin 8 regionda orta, 2 regionda mülayim, 1 regionda yüngül, 1 regionda isə güclü artdığı bildirilib.

Hesabatda həmçinin qeyd olunub: “Bir çox regionda, xüsusilə istehsal və tikinti sektorlarında xammal qiymətlərinə təzyiq əhəmiyyətli dərəcədə yüksək olaraq qalıb. Xüsusilə metallar və neft-kimya məhsulları başda olmaqla, enerji, nəqliyyat və xammal qiymətlərində genişmiqyaslı artımlar müşahidə edilib.”

Hesabatda istehlakçıların qiymətlərə qarşı həssaslığının artmasının şirkətlərin yüksələn istehsal xərclərini məhsul və xidmətlərin qiymətlərinə əks etdirmək imkanlarını məhdudlaşdırdığı bildirilib.

Mənbə: Anadolu Haber