ABŞ-Rusiya-Ukrayna nümayəndə heyətləri Birləşmiş Ərəb Əmirliklərində görüşəcək

Ukrayna Prezidenti Volodimir Zelenski ABŞ nümayəndə heyətinin bu gün Moskvaya gedəcəyini təsdiqləyərək, sabah və birigün ABŞ-Rusiya-Ukrayna nümayəndə heyətləri arasında Birləşmiş Ərəb Əmirliklərində (BƏƏ) üçtərəfli görüşlərin keçiriləcəyini açıqlayıb.

Zelenski İsveçrənin Davos qəsəbəsində keçirilən Dünya İqtisadi Forumunun (WEF) çərçivəsində çıxış edib.

O, Davosda 2025-ci ildə eyni kürsüdən Avropanın özünü müdafiə etməyi öyrənməli olduğunu vurğuladığını xatırladaraq, aradan bir il keçməsinə baxmayaraq bu sahədə konkret dəyişikliklərin baş vermədiyini bildirib.

Zelenski qeyd edib ki, Avropanın və dünyanın üzləşdiyi təhdidlər hər il fərqli formalarda ortaya çıxır və deyib:

“Hər kəs diqqətini Qrenlandiyaya yönəldib və açıq-aşkar görünür ki, liderlərin çoxu bu məsələdə nə edəcəklərinə qərar verə bilmir. Hamı ABŞ-nin bu mövzunu unudacağını, ümidlə bunun ötüb-keçəcəyini gözləyir kimi görünür. Bəs əgər keçməsə?"

İranda baş verən etirazlarla bağlı fikirlərini bölüşən Zelenski, İran xalqına kifayət qədər yardım edilmədiyini, Avropanın kənara çəkildiyini və İran hadisələri ilə bağlı ABŞ-nin necə davranacağının gözlənildiyini iddia edib.

Zelenski bildirib:

“ABŞ Prezidenti Donald Tramp Venesuelada əməliyyat keçirdi və Maduro saxlanıldı. Bu məsələ ilə bağlı fərqli fikirlər var idi. Amma reallıq budur ki, Maduro Nyu-Yorkda mühakimə olunur. Təəssüf ki, Putin mühakimə olunmur”.

TRT XƏBƏR
Lalə Qurbanlı