Asif Sayadovdan qızıl qələbə
ABŞ-nin Hyuston şəhərində Çin döyüş növləri üzrə keçirilən “Dünya Ulduzları” beynəlxalq turnirində Azərbaycan idmançıları uğurlu nəticə əldə ediblər. Çin Döyüş Növləri Assosiasiyasının prezidenti, vinq çun ustası Asif Sayadov ustadlar kateqoriyasında qızıl medal qazanıb. Digər təmsilçimiz Şıxəli Hümmətov isə vinq çun taolu proqramında bürünc medala layiq görülüb.
"ABŞ-nin Hyuston şəhərində keçirilən belə nüfuzlu beynəlxalq turnirdə Azərbaycan idmançılarının medal qazanması ölkəmizdə döyüş sənətlərinin inkişaf etdiyini göstərən mühüm göstəricidir. Bu nəticələr onu sübut edir ki, Azərbaycan idmançıları təkcə ənənəvi idman növlərində deyil, həm də Çin döyüş sənətləri kimi spesifik və yüksək texnika tələb edən sahələrdə beynəlxalq səviyyədə rəqabət apara bilirlər".
Bu sözləri Azərbaycan Çin Döyüş Növləri Assosiasiyasının və Azərbaycan Vinq-Çun Federasiyasının prezidenti, Respublikanın Əməkdar Məşqçisi Asif Sayadov "İnformator.az"a açıqlamasında deyib. O qeyd edib ki, bu uğur gənclər üçün motivasiya rolunu oynayır, döyüş sənətlərinə marağı artırır və Azərbaycanın idman imicinin beynəlxalq arenada güclənməsinə töhfə verir:
"Asif Sayadovun ustadlar kateqoriyasında qızıl medal qazanması onun uzun illər ərzində topladığı təcrübənin, yüksək peşəkarlığının və döyüş sənətinə dərindən hakim olmasının göstəricisidir. Ustadlar kateqoriyası adətən yüksək səviyyəli və böyük təcrübəyə malik idmançıların yarışdığı bölmədir. Belə bir kateqoriyada qələbə qazanmaq həm fərdi ustalığın, həm də Azərbaycanda Vinq-Çun məktəbinin formalaşdığını və beynəlxalq səviyyədə tanındığını göstərir. Çin döyüş növlərinin Azərbaycanda inkişaf perspektivləri kifayət qədər ümidvericidir. Son illərdə vinq çun, uşu və digər Şərq döyüş sənətlərinə maraq getdikcə artır. Peşəkar məşqçilərin fəaliyyəti, beynəlxalq turnirlərdə əldə olunan uğurlar və federasiyaların təşəbbüsləri bu sahənin inkişafına müsbət təsir göstərir. Gələcəkdə beynəlxalq əməkdaşlığın genişlənməsi, ustad dərslərinin təşkili və gənclərin bu idman növünə cəlb edilməsi nəticəsində Çin döyüş sənətlərinin Azərbaycanda daha da populyarlaşacağı və yeni uğurların qazanılacağı gözlənilir".
Zəhra Möhübbətova
