Bellingham və Foden İngiltərə yığmasına geri dönüblər

İngiltərə millisinin baş məşqçisi Tomas Tuchel, qarşıdakı DÇ-2026 seçmə mərhələsi oyunları üçün heyətini açıqlayıb. 

Siyahıda "Real Madrid"in yarımmüdafiəçisi Jude Bellingham və "Manchester City"nin ulduzu Phil Foden də yer alıb. Hər iki futbolçu əvvəlki toplanışa çağırılmayıb. İngiltərə ötən ay Latviyaya qarşı 5:0 hesablı qələbə qazanaraq final mərhələsinə vəsiqəni vaxtından əvvəl təmin etmişdi. Bununla belə, heyətdə yenidən dəyişikliklər olub. "Everton"un cinah oyunçusu Jack Grealish bu dəfə də dəvət almayıb. O, mövsümə yaxşı başlasa da, Tuchel onu siyahıya salmayıb. Həmçinin "Brighton & Hove Albion"un təcrübəli hücumçusu Danny Welbeck də – cari mövsümdə Premyer Liqada 6 qol vurmasına baxmayaraq – heyətdə yoxdur. Ümumilikdə, Tuchel oktyabr ayında açıqlanan son heyətlə müqayisədə altı dəyişiklik edib. Ən diqqətçəkən çatışmazlıq "Arsenal"ın müdafiəçisi Myles Lewis-Skelly olub. "Aston Villa"nın hücumçusu Ollie Watkins isə fiziki hazırlıq problemləri səbəbindən heyətə daxil edilməyib. O, ötən ay Uelsə qarşı keçirilən yoldaşlıq oyununda qol vurub. Bu dəyişikliklərlə kapitan Harry Kane heyətdə yeganə əsas hücumçu kimi qalır.Heyətə ilk dəfə "Bournemouth"un yarımmüdafiəçisi Alex Scott çağırılıb. "Manchester City"nin gənc müdafiəçisi Nico O’Reilly isə zədəli Reece James-in əvəzinə əvvəlki toplanışa çağırılmışdı və bu dəfə də yerini qoruyub. "Crystal Palace"ın yarımmüdafiəçisi Adam Wharton da milli komandaya geri dönüb.

Reuters 

Mələk Nəsirli