Böyük Britaniya Ukraynaya dəstəyi davam etdirəcək -Baş nazir

Böyük Britaniyanın Baş naziri Endi Börnham Ukraynaya ilk rəsmi səfəri zamanı Rusiyanın “qəbuledilməz təhdidlərinə” baxmayaraq, Moskvaya qarşı təzyiqləri davam etdirəcəklərini bildirib.

Börnham Ukrayna Prezidenti Volodimir Zelenski ilə görüşüb və Böyük Britaniya ilə Fransanın onun sələfi Kir Starmerin dövründə yaratdığı “könüllülər koalisiyası”nın ilk iclasına sədrlik edib.

Baş nazir bildirib ki, koalisiya Ukraynaya dəstək üçün “əllərindən gələn hər şeyi edir”. O, həmçinin ABŞ Konqresini Rusiyaya qarşı iqtisadi təzyiqləri daha da artırmağa çağırıb.

Böyük Britaniya hökuməti “Scalp” raketinin istehsalında istifadə olunan Britaniya istehsalı komponentlərin texniki layihələrini Ukraynaya təqdim etməyə razılaşıb. Fransanın “Storm Shadow” raketinin analoqu olan “Scalp” uzunmənzilli raketinin bu addımdan sonra Ukraynada istehsal edilə biləcəyi bildirilir.

Fransa və Ukrayna nümayəndələri ilə görüşündə Börnham bildirib ki, müttəfiqlər Ukraynanı hava hücumlarından qorumaq üçün öz ehtiyatlarındakı hava hücumundan müdafiə sistemlərini səfərbər etmək və digər ölkələrin də öz ehtiyatlarından istifadə etməsinə kömək göstərmək üçün “əllərindən gələn hər şeyi edirlər”.

Güllər Gülhüseynova