Çin Trampın tariflərinə baxmayaraq tarixi 1,2 trilyon dollarlıq ticarət profisiti qeydə alıb

Pekin-Çin 2025-ci ildə dünyanın indiyədək qeydə alınmış ən böyük ticarət profisitini əldə edib. Bu göstərici dünyanın ən iri istehsalçısının ABŞ-nin ticarət təzyiqlərinə baxmayaraq ixracını digər qlobal bazarlara yönəltməklə ili necə tamamladığını ortaya qoyur.

İxracın idxalı nə qədər üstələdiyini göstərən ticarət profisiti rekord səviyyəyə -1,2 trilyon dollara çatıb ki, bu da 2024-cü illə müqayisədə 20 faiz artım deməkdir. Çin şirkətləri ABŞ istehlakçılarından uzaqlaşaraq Cənub-Şərqi Asiya, Afrika və Latın Amerikası kimi inkişaf etməkdə olan bazarlara yönəlməni daha da gücləndiriblər.

Tarixən Çinin ən böyük tək bazarı olan ABŞ-yə ixrac isə 2025-ci ildə əvvəlki illə müqayisədə 19,5 faiz azalıb. Donald Trampın rəhbərlik etdiyi ABŞ-nin ticarət müharibəsinə qarşı Pekinin dayanıqlılığı ölkə daxilində qələbə kimi təqdim olunsa da, qlobal miqyasda bu profisit ucuz Çin məhsullarının bazarları sıxışdıracağı qorxusu ilə digər ölkələr arasında ticarət gərginliyini daha da artırmaq riski yaradır.

Cnn News

Ədilə Hüseynzadə