Dünya Mərkəzi Bankları ABŞ Federal Ehtiyat Sisteminin rəhbəri Pauellə həmrəylik nümayiş etdirib

Dünyanın aparıcı mərkəzi banklarının rəhbərləri ABŞ Federal Ehtiyat Sisteminin (FED) sədri Cerom Pauellə bağlı başladılan cinayət araşdırması fonunda ona tam həmrəylik ifadə ediblər. İngiltərə Bankı, Avropa Mərkəzi Bankı və Kanada Bankı daxil olmaqla 11 yüksək vəzifəli maliyyə qurumu rəhbəri yaydıqları birgə bəyanatda faiz dərəcələrinin müəyyən edilməsində mərkəzi bankların müstəqilliyinin vacibliyini vurğulayıb.

Bəyanatda Pauellin vəzifəsini dürüstlük və ictimai maraqlara sadiqliklə yerinə yetirdiyi qeyd olunub. Araşdırma onun Senatda FED binalarının təmiri ilə bağlı verdiyi ifadə ilə əlaqələndirilir. ABŞ Prezidenti Donald Tramp isə istintaq barədə məlumatsız olduğunu bildirib.

Son bir ildə Tramp Pauelli faiz dərəcələrini kifayət qədər endirməməkdə sərt tənqid edib. Pauell isə ilk dəfə açıq şəkildə çıxış edərək FED-in müstəqilliyinin siyasi təzyiq altında olduğunu deyib. Hazırda əsas faiz dərəcəsi 3,6% səviyyəsindədir, inflyasiya isə 2,7% olaraq FED-in hədəfindən yuxarı qalır.

Beynəlxalq maliyyə qurumları mərkəzi bankların müstəqilliyini iqtisadi və maliyyə sabitliyinin əsas sütunu kimi qiymətləndirib. Pauellin səlahiyyət müddəti may ayında başa çatır və onun varisi yaxın həftələrdə açıqlana bilər.

BBC
Reyhan Quliyeva