HƏMAS Qəzzada hakimiyyəti təhvil verməyə hazırlaşır

ABŞ-nin dəstəklədiyi Fələstin komitəsinin Qəzza zolağının idarəçiliyini üzərinə götürməyə hazırlaşdığı bir vaxtda, HƏMAS-ın bölgədə hakimiyyəti təhvil verməyə razılaşdığı bildirilir. Bu barədə fələstinli mənbələr məlumat yayıb.

Məlumata görə, proses HƏMAS-ın yanvarın 14-də Qahirədə Misir vasitəçiləri ilə apardığı danışıqlardan sonra sürətlənib. HƏMAS nümayəndə heyətinə hərəkatın yüksək rütbəli rəsmisi Xəlil əl-Həyyə rəhbərlik edib. Danışıqlar zamanı Qəzzanı idarə edəcək texnokratik komitənin yaradılması ilə bağlı razılıq əldə olunub.

ABŞ-nin vasitəçiliyi ilə hazırlanmış çərçivə planına əsasən, sözügedən komitə beynəlxalq “Sülh Şurası”nın nəzarəti altında Qəzza zolağının inzibati idarəçiliyini həyata keçirəcək. Bu addım ABŞ Prezidenti Donald Tramp tərəfindən 2025-ci ilin oktyabrında təqdim olunan 20 maddəlik sülh planının tərkib hissəsi hesab olunur.

Məlumatlarda bildirilir ki, HƏMAS-ın mövcud inzibati strukturlarını əvəzləməsi gözlənilən müvəqqəti quruma 18 fələstinli rəsmi dəvət olunub. Komitəyə veteran fələstinli siyasətçi Əli Şaatın rəhbərlik edəcəyi, təhlükəsizlik məsələlərinə isə istefada olan yüksək rütbəli kəşfiyyat rəsmisinin nəzarət edəcəyi qeyd olunur.

Komitənin ilk iclasını cümə axşamı Qahirədə keçirməsi planlaşdırılır. Bu görüş Vaşinqton və regional vasitəçilər tərəfindən dəstəklənən kövrək atəşkəs və sülh planının növbəti mərhələsinin icrası üçün mühüm mərhələ kimi qiymətləndirilir.

ANEWZ

Güllər Gülhüseynova