İran ilə ABŞ arasında danışıqlar başa çatıb

İran ilə ABŞ arasında Omanda keçirilən dolayı danışıqlar başa çatıb. Tərəflər hələ danışıqların nəticəsi barədə açıqlama verməyiblər.

İran dövlət televiziyasına görə, Omanın paytaxtı Maskatda TSİ 11:00 radələrində başlayan ABŞ-İran danışıqları başa çatıb və İranlı danışıqlar heyəti öz yaşayış yerlərinə qayıdıb.

İran dövlət televiziyasının müxbiri xəbər verib ki, Xarici İşlər Nazirliyinin sözçüsü İsmail Bəkayi danışıqların “müvəqqəti olaraq” sona çatdığını bildirib və hər iki ölkənin heyətlərinin öz ölkələrinə dönəcəyi gözlənilir.

Tərəflər hələ danışıqların nəticəsi barədə açıqlama verməyiblər.

Danışıqlarda İran heyətinə Xarici İşlər naziri Abbas Əraqçi rəhbərlik edib, ABŞ-ni isə Prezident Donald Trampın Yaxın Şərq üzrə Xüsusi Nümayəndəsi Stiv Uitkoff təmsil edib. Uitkoffla birlikdə Trampın kürəkəni və müşaviri Jared Kuşner, həmçinin ABŞ Mərkəzi Komandanlığı (CENTCOM) Komandanı Brad Kuper də iştirak edib.

Əraqçinin yanında Siyasi İşlər üzrə Xarici İşlər Nazirliyi müavini Məcid Taxt Revançi, İqtisadi İşlər üzrə Nazir müavini Hamid Kanberi və Nazirliyin Hüquq İşləri üzrə müavini Kazım Qəribabadi də olub.

Oman Xarici İşlər Naziri Bədr bin Hamed əl-Busaidi Erakçi ilə Uitkoff arasında mesaj mübadiləsinə vasitəçilik edib.

TRT XƏBƏR
Lalə Qurbanlı