İran lideri Xameneidən açıqlama: “İctimai həmrəyliyə zərər vuran hər cür fəaliyyət qadağandır”

İran lideri Ayətullah Müctəba Xamenei İranın ictimai həmrəyliyinə zərər verə biləcək hər cür fəaliyyətin “qəti şəkildə qadağan” olduğunu bildirib.

İran lideri Xamenei “Hökumət Həftəsi” münasibətilə mesaj yayımlayıb. ABŞ-İsrail planlarına, sanksiyalara və blokadaya baxmayaraq, İran hökumətinin gördüyü işləri yüksək qiymətləndirən Xamenei hökuməti inflyasiya, işsizlik, bazarın idarə olunması, iqtisadi artım, investisiyalar, yerli istehsalın artırılması və İran iqtisadiyyatında ABŞ dollarının rolunun azaldılması məsələlərinə ciddi diqqət yetirməyə çağırıb.

Xamenei iqtisadi problemlərin həllinin əsasının “müqavimət iqtisadiyyatı” və yerli istehsala daha çox söykənmək olduğunu bildirib. O, yerli istehsalın kifayət etmədiyi hallarda idxaldan ağıllı şəkildə istifadə edilməsinin vacibliyini qeyd edib.

İran lideri ölkəyə qarşı düşmənçilik fəaliyyətlərinin iqtisadi və digər nəticələrə səbəb ola biləcəyini, lakin daha effektiv və ağıllı idarəetmə ilə onların təsirinin məhdudlaşdırıla biləcəyini vurğulayıb.

Bütün rəsmilərin milli birlik və ictimai həmrəyliyin qorunmasına üstünlük verməli olduğunu bildirən Xamenei deyib:

“Şübhəsiz ki, keçmişdə əziz xalqımıza birbaşa və ya dolayı yolla zərər vuran, milli və ictimai motivasiyanı zəiflədən, müharibə və ya danışıqlar, uzlaşma və ya radikallıq, güzəşt və ya müharibə qızışdırıcılığı kimi xəyali ikiliklər yaradan ritorikalar bundan sonra da eyni təsirə malik ola bilər. Buna görə də ictimai həmrəyliyə zərər vuran hər cür fəaliyyətin qəti şəkildə qadağan olduğunu elan edirəm.”

Xamenei “zəifliklərin və çatışmazlıqların” açıq şəkildə vurğulanmasının ölkənin düşmənlərinə fayda verə biləcəyi barədə xəbərdarlıq edib və İranın gücünün ön plana çıxarılmasının vacibliyini vurğulayıb.

Mənbə: HABER GLOBAL