Laçında yeni həyat: quruculuqdan inkişaf yoluna
Laçın bu gün genişmiqyaslı quruculuq və yenidənqurma işlərinin aparıldığı mühüm inkişaf mərkəzinə çevrilib. Şəhərdə müasir yaşayış məhəllələri və infrastruktur layihələri həyata keçirilir.
Mövzu ilə bağlı”İnformator.az”a açıqlamasında politoloq Zeynal Əmrəliyev bildirib ki,Laçın rayonunda həyata keçirilən genişmiqyaslı bərpa və quruculuq işləri bölgənin gələcək inkişafının möhkəm təməlini qoyur:
“Bu proses təkcə binaların tikintisi ilə məhdudlaşmır. Burada tamamilə yeni və modern sosial-iqtisadi model formalaşır. İşğaldan azad edilmiş ərazilərə "Böyük Qayıdış" proqramı çərçivəsində əhalinin mərhələli köçürülməsi sürətlə davam edir. Keçmiş məcburi köçkünlərin doğma yurdlarına qayıtması bölgədə insan kapitalının bərpasına xidmət edir. Sakinlər üçün müasir mənzillər, məktəblər və xəstəxanalar istifadəyə verilir.Eyni zamanda yeni iş yerləri yaradılır və əhalinin məşğulluq imkanları artırılır”.
Politoloq qeyd edib ki,Laçında qurulan infrastrukturlar bölgənin iqtisadi potensialını maksimum dərəcədə hərəkətə gətirir:
“Tikintisi aparılan Laçın Beynəlxalq Hava Limanı və çəkilən müasir magistral yollar rayonu mühüm nəqliyyat qovşağına çevirir. Bu nəqliyyat şəbəkəsi həm ölkə daxilində, həm də regional miqyasda yükdaşımaları və gediş-gəlişi xeyli asanlaşdırır. Laçının eşsiz təbiəti və relyefi turizmin inkişafı üçün böyük imkanlar açır. Rayonda ekoturizm, dağ-xizək turizmi və müalicəvi sanatoriya mərkəzlərinin yaradılması nəzərdə tutulur. Bu addımlar bölgəyə yerli və xarici turistlərin cəlb edilməsinə şərait yaradacaq”.
Onun sözlərinə görə, sənaye və kənd təsərrüfatı sahəsində reallaşdırılan layihələr də rayonun gələcək simasını müəyyən edir:
“Laçında qurulan aqroparklar, müasir kənd təsərrüfatı kompleksləri və kiçik istehsalat müəssisələri daxili istehsalı gücləndirir. Eyni zamanda Laçın "yaşıl enerji" zonası konsepsiyasına uyğun olaraq yenidən qurulur. Çaylar üzərində inşa edilən kiçik su elektrik stansiyaları bölgənin ekoloji cəhətdən təmiz enerji ilə təmin olunmasını həyata keçirir. Bütün bu tədbirlər Laçının iqtisadi baxımdan özünü təmin edən strateji mərkəzə çevrilməsini şərtləndirir. Sərhəd rayonu kimi Laçının sürətlə məskunlaşması və inkişafı ölkəmizin milli təhlükəsizlik sistemini də daha da
möhkəmləndirir. Nəticədə Laçında başlayan yeni həyat bütün regionun tərəqqisinə güclü təkan verir”.
Nurgün Qənizadə
