OL Lyonnes Avropanı yenidən fəth etməyə hazırlaşır

Fransanın qadın futbolunun flaqman klubu olan OL Lyonnes yeni ad, yeni rəhbərlik və gücləndirilmiş heyətlə Çempionlar Liqasını yenidən qazanmağı hədəfləyir. Michele Kangın sahibi olduğu klub artıq həm ölkə çempionatında, həm də Avropada məğlubiyyətsiz irəliləyir.

Mayın 19-da ad dəyişikliyindən sonra klub “Yeni hekayə, eyni əfsanə” şüarı ilə fəaliyyətə başlayıb. Yayda Jule Brand, Ashley Lawrence, Ingrid Engen, Marie-Antoinette Katoto kimi ulduz transferlərlə güclənən Lyon qadınları bütün mövsümü Groupama Stadionunda oynayacaq.

İdman direktoru Vinsent Ponsot klubun məqsədini açıq şəkildə bildirib: “Çempionlar Liqasını tez bir zamanda yenidən qazanmaq istəyirik". Onun sözlərinə görə, klub indiyədək qurulmuş “ən yaxşı qadın futbol komandası”na malik olduğunu düşünür.

Kang insan resurslarını ikiqat artırıb, yeni kommunikasiya və marketinq komandaları yaradılıb, həmçinin Mézieuxdə müasir təlim-məşq bazası və ayrıca stadion tikintisi planlaşdırılır.

Bununla belə, klub ən böyük çətinliyi tribunaların doldurulmasında görür: orta tamaşaçı sayı 5 500 nəfərdir ki, bu da böyük stadion üçün yetərli deyil. OL Lyonnes kişi komandasının azarkeşlərini cəlb etmək üçün DJ setlər, oyunlar və fan-zonalar təşkil edir.

Fransada qadın futbolunun kommersiya imkanlarının zəif olması klubun digər problemini yaradır. Ponsot deyir ki, LFFP ilə yeni anlaşma və liqanın güclənməsi Avropada rəqabətə davam gətirmək üçün vacibdir.

OL Lyonnes-in ümumi hədəfi isə bir cümlədə ifadə olunur: “Eyni imkanları verdikdə qadın futbolu da eyni nəticələri göstərə bilər”.

The Guardian
Eslanda Kulieva