Putinlə dialoqu yenidən başlatmaq üçün hazırlıq işləri davam edir

Fransa Prezidenti Emmanuel Makron bəyan edib ki, Rusiya Prezidenti Vladimir Putinlə dialoqu yenidən bərpa etmək üçün texniki səviyyədə hazırlıq işləri davam edir. Bunun məqsədi müharibənin sonu və gələcəkdə sülh danışıqlarına yol açmaq üçün ilkin şərait yaratmaqdır.

Makron jurnalistlərə bildirib ki, bu proses hələ ali səviyyədə rəsmi danışıqlar başlaması demək deyil, lakin mövcud texniki müzakirələr aparılır və bu işlər şəffaf şəkildə, Ukrayna Prezidenti Volodimir Zelenski və əsas Avropa tərəfdaşları ilə məsləhətləşmələr şəklində həyata keçirilir.

Makron vurğulayıb ki, belə bir dialoq kanallarını bərpa etmək Avropa üçün faydalı ola bilər, lakin hazırda Rusiya tərəfinin yaxın vaxtlarda sülh sazişi bağlamağa real hazır olduğunu düşünmür.

O, həmçinin qeyd edib ki, Rusiya ordusunun Ukraynanın enerji infrastrukturlarına hücumları davam edir və bu, Moskvanın sülhə hazır olduğunu göstərmir. Buna baxmayaraq, Makron hesab edir ki, Rusiya ilə dialoq kanallarının açılması gələcək təhlükəsizlik zəmanətlərini müzakirə etmək üçün vacibdir. 

Hazırda danışıqlar üçün konkret tarix və ya səlahiyyətli görüş planlaşdırılmayıb.

Rusiyanın Kremldə rəsmi mətbuat katibi Dmitri Peskov bildirib ki, hazırda Makronun bəyan etdiyi kimi ali səviyyədə dialoqa dair konkret hazırlıq yoxdur. Onun sözlərinə görə, işçi səviyyəsində müəyyən təmaslar var, lakin bu, hələ böyük diplomatik görüşlərin yaxınlaşdığına işarə deyil.

EURONEWS

Aysun Xanatova