Səkilərdə qanunsuz parklanma piyadaların hərəkətinə mane olur

Səkilərdə avtomobillərin qanunsuz park edilməsi piyadaların, xüsusilə, əlilliyi olan şəxslərin, yaşlıların və uşaq arabası ilə hərəkət edən insanların sərbəst hərəkətinə mane olur. Problemin qarşısının alınması üçün cərimələrin sərtləşdirilməsi ilə yanaşı, parklanma imkanlarının artırılmasının vacibliyi vurğulanır.

Ekspertin sözlərinə görə, problemin həlli üçün ilk növbədə yeni parklanma qaydalarının effektiv şəkildə tətbiqinə nəzarət edilməlidir. Onun fikrincə, kiçik həcmli obyektlərin tikintisinə icazə verilərkən onların qarşısında parklanma yerinin nəzərdə tutulması əsas şərtlərdən biri olmalıdır.

Ekspert bildirib ki, səkilərdə avtomobil saxlamağa görə cərimələr tətbiq olunsa da, mövcud tədbirlər problemin qarşısını tam almağa kifayət etmir:

“Səkidə avtomobil saxlanılmasına görə daha ciddi tədbirlər görülməlidir. Burada yalnız cərimə deyil, avtomobilin cərimə meydançasına aparılması və daha uzunmüddətli sanksiyaların tətbiqi də nəzərdən keçirilməlidir".

Onun sözlərinə görə, problemin uzunmüddətli həlli üçün şəhərin müxtəlif ərazilərində yeraltı parklanma məntəqələrinin sayı artırılmalıdır. Ekspert hesab edir ki, həm piyadaların, həm də avtomobil istifadəçilərinin hüquqları nəzərə alınmalı, parklanma problemi yalnız inzibati tədbirlərlə deyil, şəhərsalma və memarlıq baxımından da həll edilməlidir.

Ekspert əlavə edib ki, küçə və prospektlərdə kiçik, orta və iri həcmli yeraltı parklanma məkanlarının yaradılması bu problemin azalmasına kömək edə bilər.

Beləliklə, səkilərdə qanunsuz parklanmanın qarşısının alınması üçün nəzarətin gücləndirilməsi, cərimələrin effektiv tətbiqi və alternativ parklanma yerlərinin yaradılması əsas istiqamətlər kimi qiymətləndirilir.