Saman damlı keçmiş bank binası Grade II statusu ilə qoruma altına alınıb

Böyük Britaniyada bir vaxtlar bank kimi istifadə olunan saman damlı tarixi bina Grade II siyahısına daxil edilib. Kembricşirin Littleport şəhərinin Main Street küçəsində yerləşən keçmiş Lloyds Bank binası Mədəniyyət, Media və İdman Departamentinin qərarı və Historic England-ın tövsiyəsi ilə rəsmi qoruma statusu alıb.

1931-ci ildə inşa edilən bina saman damı, dekorativ suvaqları və oyma qapıları ilə seçilir və məqsədli şəkildə kommersiya bankı kimi tikilmiş nadir memarlıq nümunələrindən biri hesab olunur. Historic England binanın dizaynında Şərqi İngiltərəyə xas yerli memarlıq üslubunun və yüksək sənətkarlığın əks olunduğunu bildirib.

Binada əvvəllər bank zalı və menecer otağı ilə yanaşı, bank meneceri və ailəsi üçün yaşayış sahələri də mövcud olub. Daha sonra ofis, 2016-cı ildən isə yaşayış mənzilləri kimi istifadə edilib. Mütəxəssislər bu tarixi binanın Littleportun memarlıq kimliyinin mühüm hissəsi olduğunu vurğulayaraq, onun gələcək nəsillər üçün qorunacağını qeyd ediblər.

BBC
Reyhan Quliyeva