Tehran Hörmüz boğazında ABŞ ilə toqquşmadan sonra “sarsıdıcı cavab”la hədələyir

İran cümə günü təsdiqləyib ki, Silahlı Qüvvələri Tehranın “ABŞ Hərbi Dəniz Qüvvələrinin atəşkəsi pozması” adlandırdığı addıma cavab verib. Tehran bildirib ki, cümə axşamı axşamı Hörmüz boğazı yaxınlığında İran gəmiləri və mülki ərazilər hücuma məruz qalıb.

“Xatəm əl-Ənbiya” Mərkəzi Qərargahının sözçüsü polkovnik İbrahim Zülfüqari cümə günü yaydığı bəyanatda bildirib ki, iki ölkə arasında atışmadan sonra İran “ən kiçik tərəddüd olmadan istənilən təcavüzə sarsıdıcı cavab verəcək”.

Zülfüqarinin sözlərinə görə, ABŞ ordusu atəşkəsi pozaraq İranın Cask bölgəsindəki sahil sularından Hörmüz boğazına doğru hərəkət edən neft tankerini, həmçinin BƏƏ-nin Füceyrə limanı qarşısında Hörmüzə daxil olan başqa bir gəmini hədəfə alıb.

Hərbi xəbərlər yayan “DefaPress” saytının yaydığı məlumata görə, o bildirib: 

“Eyni zamanda onlar regiondakı bəzi ölkələrlə əməkdaşlıq çərçivəsində Xəmir, Sirik limanları və Qeşm adasının sahillərində yerləşən mülki ərazilərə hava zərbələri endiriblər”.

Zülfüqari əlavə edib ki, “İran Silahlı Qüvvələri dərhal cavab tədbiri görərək Hörmüz boğazının şərqində və Çabahar limanının cənubunda yerləşən ABŞ hərbi gəmilərinə hücum edib və onlara ciddi ziyan vurub”.

ANEWZ
Lalə Qurbanlı