Ukraynanın Aİ üzvlüyü

Ukraynanın Avropa İttifaqına (Aİ) üzvlüyü təhlükəsizlik baxımından mühüm hesab edilsə də, bu proses ciddi çətinliklərlə müşayiət olunur. Üzvlük üçün genişmiqyaslı islahatların həyata keçirilməsi tələb olunur və bütün qərarlar Aİ-yə üzv 27 ölkənin yekdil razılığı ilə qəbul edilməlidir.

Avropa Komissiyasının sədri Ursula Fon der Lyayen Ukraynanın Aİ-yə üzvlüyünün ölkənin gələcək təhlükəsizlik təminatlarının əsas elementlərindən biri olduğunu bildirib. O, bu fikirləri Avropa liderləri ilə keçirilən və sülh danışıqlarının müzakirə edildiyi toplantıdan sonra səsləndirib.

Fon der Lyayen Almaniya, Fransa və Polşa liderlərinin də iştirak etdiyi “Berlin formatı” çərçivəsində keçirilən görüşdən sonra sosial şəbəkədə paylaşım edərək qeyd edib:

“Ukraynanın Aİ-yə üzvlüyü özlüyündə bir təhlükəsizlik təminatıdır”.

Onun sözlərinə görə, azad Ukraynanın rifahı Aİ-yə üzvlükdən keçir:

“Genişlənmə təkcə üzv olmaq istəyən ölkələr üçün deyil, bütövlükdə Avropa üçün faydalıdır”.

Bu açıqlamalar ABŞ, Ukrayna və Avropa ölkələri arasında aparılan intensiv diplomatik təmaslardan sonra verilib. ABŞ Prezidenti Donald Trampla keçirdiyi ikitərəfli görüşdən sonra Ukrayna Prezidenti Volodimir Zelenskiy tərəflər arasında təhlükəsizlik təminatları ilə bağlı razılaşmanın “demək olar ki, əldə olunduğunu” bildirib.

Ukraynanın Aİ-yə üzvlüyü təhlükəsizlik baxımından vacib sayılsa da, proses hələ də ciddi maneələrlə üzləşir. Üzvlük üçün dərin islahatlar aparılmalı və bütün qərarlar 27 üzv dövlətin yekdil səsi ilə qəbul edilməlidir.

Avropa Komissiyası isə Ukraynanın texniki baxımdan növbəti mərhələyə keçməyə hazır olduğunu bildirir. Prosesin ləngiməsi Aİ-də yekdillik prinsipinin dəyişdirilməsi ilə bağlı müzakirələri yenidən gündəmə gətirsə də, bu istiqamətdə hələlik konkret addım atılmayıb.

Euronews

Zəri Bayramlı