Şeyx Hasinanı daşıyan təyyarə real vaxtda ən çox izlənilən təyyarə oldu

Bölmə: Dünya › ,
Tarix: 18:49 06.08.2024

Flightradar24 xidmətinin məlumatına görə, Banqladeşin istefa vermiş baş naziri Şeyx Hasinanı Hindistanın şərqindən Yeni Dehliyə aparan təyyarə bazar ertəsi real vaxt rejimində dünyanın ən çox izlənilən təyyarəsi olub.

Bazar ertəsi günortadan sonra göyərtəsində Şeyx Hasina olan təyyarə Hindistanın mərkəzi Uttar Pradeş əyalətinin Varanasi şəhəri üzərində uçarkən, eyni vaxtda 29000 istifadəçi tərəfindən izlənilib.

Banqladeşin baş naziri Şeyx Hasina hökumət əleyhinə kütləvi etirazlardan sonra istefa verib və Hindistana uçub. Onun göyərtəsində olan təyyarə Yeni Dehlidən 40 km aralıda yerləşən Qaziabadda Hindistan Hərbi Hava Qüvvələrinin bazası olan Hindon hava limanına enib. Hindistanın baş naziri Narendra Modi iqamətgahında qonşu ölkədəki vəziyyətlə bağlı iclas keçirib.

Tədbirdə Hindistanın xarici işlər naziri Subrahmanyam Caishankar və Hindistan baş nazirinin milli təhlükəsizlik müşaviri Ajit Doval iştirak ediblər. Şeyx Hasinanın görüşdə olması barədə məlumat yoxdur. Bildirilib ki, o, Hindistana gəldikdən sonra Hindistan təhlükəsizlik qüvvələrinin köməyi ilə təhlükəsiz yerə aparılıb.

Mənbə: TASS.com
Tərcümə etdi: Gülnisə Əfkari