20 Noyabr

Ağdamın işğaldan azad edilməsi Azərbaycanın müasir tarixində dönüş nöqtəsi kimi qiymətləndirilir. 27 il düşmən nəzarətində qalan rayon 2020-ci il noyabrın 20-də əldə olunan üçtərəfli Bəyanatın şərtlərinə əsasən Azərbaycanın tam nəzarətinə qaytarılıb. Döyüşsüz təhvil verilən Ağdam həmin gün ölkədə həm hərbi, həm də siyasi qələbənin rəmzinə çevrilib.

Azadlıqdan sonra bölgədə genişmiqyaslı tikinti və bərpa işlərinə start verilib. Ağdam şəhərinin baş planı təsdiqlənib, infrastruktur xətləri çəkilir, yollar salınır, yeni yaşayış massivləri inşa olunur, kəndlər bərpa edilir. Artıq bir neçə sosial obyekt və strateji layihənin açılışı baş tutub, növbəti mərhələdə əhalinin mərhələli şəkildə qayıdışı nəzərdə tutulur.

Bu gün Ağdam təkcə bərpa olunan bir şəhər deyil, həm də Azərbaycanın gücünün, iradəsinin və birlik ruhunun simvoludur. İşğalın izlərini silən hər bir tikili, çəkilən hər yol, bərpa olunan hər kənd bu torpağın gələcəyinə atılan möhkəm addımdır. Ağdamın dirçəlişi onun sakinlərinin illərlə içində daşıdığı ümidin reallaşması, Azərbaycanın isə tarixi ədaləti bərpa etməsinin canlı ifadəsidir.

Ağdam yenidən həyat qazanır — sükutun yerini səs, xarabalığın yerini inkişaf, nisgilin yerini ümid alır. Bu torpağın nəfəsi, bu şəhərin gələcəyi artıq geri qayıdır. Qarabağın ürəyi sayılan Ağdam bu gün əvvəlkindən daha güclü, daha işıqlı bir sabaha doğru addımlayır.

Nuray Əliyeva