2026-cı ilin ən maraqlı 18 podkastı – Barak Obamadan “Game of Thrones” ulduzlarına qədər
2026-cı ilin ilk aylarında podkast dünyasında müxtəlif mövzuları əhatə edən yeni layihələr təqdim olunub. Keçmiş ABŞ prezidenti Barak Obamanın kitab söhbətlərindən tutmuş araşdırma xarakterli kriminal hekayələrə, musiqi tarixindən şəxsi həyat hekayələrinə qədər fərqli mövzular dinləyicilərin diqqətini çəkib.
BBC-nin seçiminə görə, ilin ilk yarısında yayımlanan və dinlənilməsi tövsiyə olunan 18 podkast arasında aşağıdakı layihələr yer alır:
1. “Where Is Austin Tice?” – Ostin Tays haradadır?
ABŞ dəniz piyadası olmuş jurnalist Ostin Tays 14 il əvvəl Suriyada yoxa çıxıb. Onun öldürüldüyü güman edilsə də, sonradan sağ ola biləcəyinə dair yeni məlumatlar ortaya çıxıb. NPR və BBC-nin birgə hazırladığı podkast jurnalistlərin Taysın izinə düşmək üçün Suriyaya səfərindən bəhs edir. Araşdırmada casusluq, ört-basdır edilən hadisələr və Suriyadakı rejimin fəaliyyəti kimi mövzular araşdırılır.
2. “A Great Book with Barack Obama” – Barak Obama ilə böyük kitab söhbətləri
ABŞ-ın keçmiş prezidenti Barak Obamanın kitab və audioya olan marağını bir araya gətirən layihədə tanınmış yazıçı və fikir adamları ilə söhbətlər aparılır. İlk bölümdə Obama aktyor Tom Henkslə Merilin Robinsonun “Gilead” romanını müzakirə edir. Söhbət kitabdan əlavə yaşlanma, ölüm və həyatda sahib olduğumuz məhdud zaman kimi mövzulara da yönəlir.
3. “Intimacy” – “İntimlik”
“Game of Thrones” serialının ulduzu Lena Hidi tərəfindən yazılan və rejissorluğu edilən audio dramda film və televiziya layihələrində intim səhnələrin çəkilişinə nəzarət edən koordinatorun hekayəsi danışılır. Baş rolda Hidi ilə yanaşı Meysi Uilyams, Hanna Vaddinqem və Alison Stedman da yer alır. Podkast razılıq, travma və kino sənayesindəki münasibətlər kimi mövzulara toxunur.
4. “The Mindhunter” – “Ağıl ovçusu”
Jurnalist Fransisko Qarsiya və prodüser Brenna Daldorf kriminal profayler və keçmiş polis əməkdaşı Pol Harrisonun fəaliyyətini araşdırırlar. Harrison FTB ilə Ceffri Damer və Çarlz Menson işlərində çalışdığını, həmçinin “Yorkşir Ripper” kimi tanınan seriyalı qatil ilə görüşdüyünü iddia edir. Araşdırma kriminal janrına olan marağın səbəblərini və müasir nəşriyyat sənayesindəki problemləri də gündəmə gətirir.
5. “Legend: The Miles Davis Story” – “Əfsanə: Maylz Devisin hekayəsi”
BBC-nin “Legend” seriyasının yeni buraxılışı caz musiqisinin əfsanələrindən Maylz Devisə həsr olunub. Layihədə Devisin musiqi dahisi və caz pioneri kimi fəaliyyəti ilə yanaşı, şəxsi həyatının mürəkkəb tərəfləri də araşdırılır. Podkasta “The Wire” serialından tanınan aktyor Klark Piters aparıcılıq edir.
6. “Death of an Artist” – “Sənətçinin ölümü”
Uşaq yazıçısı Petra Meters və fotoqraf həyat yoldaşı Maykl Meters 2024-cü ildə ABŞ-ın Oreqon ştatındakı evlərində ölü tapılıblar. Hadisənin intihar olduğu bildirilib. Jurnalistlər Elis Qreqori və Leon Neyfak onların yaxınlarına göndərdikləri vida məktublarının alıcıları ilə danışaraq cütlüyün həyatı, yaradıcılığı və geridə qalan insanların yaşadığı ağrıdan bəhs edirlər.
7. “What To Carry On, What to Burn”
Uzun məsafəli it xizəyi yürüşçüsü və səyyah Bler Braverman tarixdə baş vermiş sağ qalma hekayələrini danışır. Podkastda dənizdə gəmi qəzasından sonra 18 ay adada yaşayan şəxsdən, Arktika ekspedisiyası zamanı tək qalan tikişçidən və təyyarə qəzasından sonra ağır yaralı vəziyyətdə dağdan enərək xilas olan rəssamdan bəhs edilir.
8. “Manifesto”
Podkastın müəllifi Den Taberski siyasi manifestlərin tarixini araşdırır. Bu sənədlərin bəzilərində zorakılıq və nifrət çağırışları yer alsa da, digərləri ictimai dəyişiklik və idealist ideyaların ifadəsi kimi təqdim olunur. Altı bölümdən ibarət layihədə müxtəlif ictimai hərəkatların nümayəndələri ilə müsahibələr aparılır.
9. “Intrigue: To Catch a King”
Jurnalist Syu Mitçell və keçmiş hərbçi, humanitar yardım əməkdaşı Rob Lori insan qaçaqmalçılığı ilə bağlı araşdırmalarını davam etdirirlər. Onlar bu dəfə “Kardo Ranya” adı ilə fəaliyyət göstərən qaçaqmalçının izinə düşürlər. Podkastda insanların daha yaxşı həyat ümidi ilə təhlükəli yollarla Avropaya getməyə çalışması da diqqət mərkəzindədir.
10. “The Idiot” – “Axmaq”
“Serial” podkastının yaradıcılarının qurduğu “Serial Productions” tərəfindən hazırlanan layihə Allen adlı şəxsin həyatından bəhs edir. Ailə daxilində başlayan adi münaqişə zamanla mürəkkəb xarakter araşdırmasına çevrilir.
11. “Hit That Perfect Beat: The London Records Story”
Podkast Böyük Britaniyanın məşhur “London Records” səsyazma şirkətinin tarixindən bəhs edir. Şirkət “The Communards”, “Bananarama”, “Shakespears Sister”, “Fine Young Cannibals”, “Goldie”, “Orbital” və “All Saints” kimi qrupların tanınmasında rol oynayıb. Layihədə 1980–90-cı illərin musiqi sənayesindəki rəqabət, şöhrət və dəbdəbəli həyat tərzi də araşdırılır.
12. “The Girlfriends: Trust Me Babe”
Podkast Minnesotada romantik münasibətlər quraraq qadınları minlərlə dollar məbləğində aldadan Derek Alldredin ifşa edilməsindən bəhs edir. Hadisədə zərərçəkən qadınlar bir araya gələrək fırıldaqçının cinayətlərinin üzə çıxarılmasına kömək ediblər.
13. “A History of the United States in 100 Objects”
ABŞ tarixinin 250 illiyi münasibətilə hazırlanan podkast ölkənin tarixini gündəlik həyatda istifadə olunan əşyalar vasitəsilə təqdim edir. Burada vintin yivindən tutmuş 1876-cı ildə bağlanan və bir əsr sonra açılan zaman kapsuluna qədər müxtəlif əşyaların arxasındakı tarix araşdırılır.
14. “Get Birding with Sean Bean”
“Game of Thrones” serialında Ned Stark obrazını canlandıran aktyor Şon Bin quş müşahidəsinə həsr olunan podkastın yeni aparıcısıdır. Uşaqlıqdan quşlara marağı olan aktyor verilişdə quşlar üçün uyğun bağların yaradılması, yuva qutuları və təbiətlə bağlı müxtəlif mövzulardan danışır.
15. “Shadow World: Impulsive”
BBC-nin “Shadow World” seriyasının yeni buraxılışında Parkinson xəstəliyinin müalicəsində istifadə olunan bəzi dərmanların impuls nəzarəti ilə bağlı yarada biləcəyi problemlər araşdırılır. Layihədə dərmanların təsirindən alış-veriş, qumar, oğurluq və digər kompulsiv davranışlara yönələn insanların hekayələrinə yer verilir.
16. “Blood Memory”
Kaliforniyada iki nəfəri öldürməkdə ömürlük həbs cəzası çəkən Maykl Linn Tompson həbsxanada neonasist “Aryan Brotherhood” qrupuna qoşulub. Daha sonra qrupdan ayrılaraq onun üzvlərinə qarşı ifadə verib. Podkastda Tompson öz həyat hekayəsini, zorakılıqla dolu keçmişini və həbsxanadakı təcrübələrini danışır.
17. “Creation Myth”
Belçikalı audio prodüser Helena de Qrut evlənməzdən əvvəl övlad sahibi olmaq istəmədiyini həyat yoldaşına bildirib. Lakin illər keçdikcə həyat yoldaşı onun fikrini dəyişməyə çalışıb. Podkastda de Qrut analıqla bağlı qərarını, öz tərəddüdlərini və bu seçimin şəxsi həyatı ilə münasibətlərinə təsirini araşdırır.
18. “City of Lights” – “İşıqlar şəhəri”
2002-ci ildə ABŞ-ın İllinoys ştatının Aurora şəhərində 21 yaşlı Ceff Siqnoelli güllələnərək öldürülüb. Hadisə ilə bağlı heç kim həbs edilməyib və cinayət hələ də açılmayıb. Lakin podkastın əsas mövzusu qatili tapmaq deyil. Layihədə cinayətdən sonra ailənin yaşadığı itki, uzun illər davam edən mübarizə və şəhərdə zorakı cinayətlərin yaratdığı sosial problemlər araşdırılır.
Elmira Ağayeva
