ABŞ İran radar obyektlərini vurduğunu bildirib, Küveyt isə raket və dron hücumları barədə məlumat verib

ABŞ Mərkəzi Komandanlığı (CENTCOM) bildirib ki, həftəsonu İranın cənubunda və Hörmüz boğazında yerləşən radar və pilotsuz uçuş aparatlarının idarəetmə məntəqələrinə “özünümüdafiə zərbələri” endirilib. Vaşinqton bu addımı İranın aqressiv hərəkətlərinə, o cümlədən beynəlxalq sularda ABŞ pilotsuz aparatının vurulmasına cavab kimi izah edib. İran isə cavab olaraq ABŞ-nin istifadə etdiyi hava bazasına zərbə endirdiyini açıqlayıb və bu hücumları atəşkəsin pozulması kimi qiymətləndirib.

Eyni zamanda Küveyt raket və dron hücumları ilə üzləşdiyini, hava hücumundan müdafiə sistemlərinin işə salındığını bildirib və İranı bölgədə təhlükəli eskalasiyada ittiham edib. Tərəflər arasında gərginlik davam etdiyi halda, ABŞ və İran arasında daimi sülh sazişi üzrə danışıqlar irəliləmir; əsas fikir ayrılıqları Hörmüz boğazının açılması və İranın zənginləşdirilmiş uranı ilə bağlı tələblər üzərində cəmlənib. ABŞ prezidenti Donald Tramp isə tərəflərin razılaşmaya yaxın olduğunu iddia edir.

BBC News
Mələk Hüseynova