Almaniyada içki alarkən nələri bilməlisiniz?

Berlindəki barlardan Bavariyanın pivə bağlarınadək Almaniyada hesabın kim tərəfindən ödənilməsi məsələsinə ciddi yanaşılır. Bəs niyə hesabı ayrı-ayrılıqda ödəmək dostluğun göstəricisi hesab oluna bilər?

Təsəvvür edin, Almaniyaya səyahət etmisiniz və yerli dostlarınızdan ibarət yeni bir qrupla şam yeməyinə getmisiniz. Hamı yeməyini yeyib, bir-iki içki içib və xoş vaxt keçirib.

Nəhayət, hesab gəlir.

Amma heç kim “Gəlin, hesabı hamımız bərabər bölüşək” demir. Əvəzində ilk şəxs ofisianta nə sifariş etdiyini dəqiq söyləyir: spagetti və iki pivə. Sonra yalnız öz sifarişinin məbləğini ödəyir. Növbəti şəxs isə pizzasının və bir qədəh şərabın pulunu verir. Bu qayda ilə hesab masadakı hər kəs üçün ayrı-ayrılıqda hesablanır.

Almaniyaya xoş gəlmisiniz! Dəqiqliyin hətta dostlarla keçirilən axşamların da bir hissəsi olduğu bu ölkədə hesabı hamı arasında bərabər bölüşmək geniş yayılmayıb. Eyni zamanda, bir-birinə növbə ilə içki almaq da digər ölkələrdəki qədər səxavətli jest hesab edilmir.

Hamının bərabər məbləğ ödəməsinə və ya barda növbə ilə içki almasına öyrəşən turistlər üçün bu cür dəqiq hesablaşma bir qədər qəribə və rəsmi görünə bilər. Xüsusilə də zəngin pivə mədəniyyəti ilə tanınan bir ölkədə belə bir sual yaranır: almanlar niyə bir-birinə içki almırlar?

Bu yazılmayan qayda hətta ən qeyri-rəsmi məclislərdə də özünü göstərir. Məsələn, yay axşamlarında Berlində gənclər barları gəzmək əvəzinə, çox vaxt Späti adlanan gecə saatlarınadək fəaliyyət göstərən kiçik mağazaların qarşısında toplaşırlar. Belə məkanlarda növbəti içkiləri almaq üçün bir nəfər mağazaya getsə belə, bunu səxavət əlaməti kimi qəbul etmək olmaz. Çünki hesablaşma qaydası yenə də qüvvədə qalır.

Berlindəki Kreuzberg rayonunda yerləşən lüks Orania Berlin hotelinin barmeni Julian Berger deyir:

“İnsanlar kimin neçə dəfə içki aldığını mütləq hesablayacaqlar”.

Almanla ailəli olan avstriyalı trend tədqiqatçısı doktor Harald Pitters hesab edir ki, bu yanaşmanın kökündə ədalət hissi və vəziyyətə nəzarəti itirməmək istəyi dayanır. O, həmçinin qeyri-müəyyənliyin növbə ilə içki almağı necə narahat vəziyyətə çevirdiyinin şahidi olub.

“Ən yaxın dostlarımdan ikisi almandır və birlikdə çölə çıxanda bu məsələ həmişə mübahisə mövzusu olurdu. Onlar növbə ilə içki almaq fikrini xoşlamırdılar. Çünki nə qədər qalacağımızı və neçə dəfə içki sifariş edəcəyimizi əvvəlcədən bilmək mümkün deyildi. Hər kəs öz hesabını ödədikdə isə məyusluq üçün heç bir səbəb qalmır”, - deyə o bildirir.

Berger də bu fikri təsdiqləyir:

“Almanların güclü ədalət hissi var. Hər kəsin öz hesabını ödəməsi onlara daha rahat gəlir. Onlar tərəflər arasında balansın pozulmasını sevmirlər”.

Başqa sözlə, hesabın dəqiq aparılması heç də xəsislik əlaməti hesab olunmur. Əksinə, bu, dostluq münasibətlərini qorumağın bir yolu kimi qəbul edilir. Hətta almanların bu düşüncə tərzini ifadə edən bir atalar sözü də var: “Klare Rechnung, gute Freunde” – “Dəqiq hesab, möhkəm dostluq”.

Lakin hər bir ənənədə olduğu kimi, bu qaydanın da istisnaları var. Almaniyanın cənubundakı Biergarten adlanan pivə bağlarında, əsasən bir litrlik böyük pivə bokallarının təqdim edildiyi məkanlarda növbə ilə içki almaq daha geniş yayılıb. Əslində, Almaniyanın Bavariya kimi ənənələrə bağlı bölgələrində dostların bir-birinə içki almasına daha çox rast gəlinir.

Bu, xüsusilə gənclər arasında yenidən populyarlıq qazanan ənənəvi yerli festivallarda özünü göstərir. Pittersin sözlərinə görə, belə tədbirlərdə növbə ilə içki almaq adi haldır.

“Pivənin əsas içki olduğu Erntedankfest (Məhsul bayramı) festivalında növbə ilə içki almaq tamamilə normaldır. Əgər yalnız özünüzə və partnyorunuza içki alsanız, sizi həddindən artıq rəsmi və sərt düşüncəli biri hesab edə bilərlər. Eyni vəziyyət Kölndə keçirilən Karneval (Karnaval) və Hamburqdakı Hafengeburtstag (Limanın yaranma ildönümü) tədbirlərinə də aiddir. Yəni içki, rəqs və ümumi əyləncənin olduğu bütün kütləvi tədbirlərdə bu ənənəyə rast gəlinir”, – deyə o qeyd edir.

Bəs turistlər necə davranmalıdır?

Bergerin tövsiyəsi budur ki, qarşı tərəf başqa cür təklif etmədiyi müddətdə hər kəsin öz hesabını ödəyəcəyini nəzərə almaq lazımdır.

“Əgər kiminləsə birlikdə olduğunuz zaman həmin şəxs sizə ‘Ich lade dich ein’ (Səni mən qonaq edirəm) deyirsə, bu, hesabı onun ödəyəcəyi deməkdir”, – deyə o izah edir.

Həmçinin hesabı ayrı-ayrılıqda ödəmək üçün ofisianta müraciət etməkdən çəkinməyə ehtiyac yoxdur. Əksər ofisiantlar müştərilərdən avtomatik olaraq “Getrennt oder zusammen?” (Ayrı-ayrılıqda, yoxsa birlikdə?) deyə soruşurlar.

Bir çox alman üçün isə bu suala verilən ən təbii cavab hələ də belədir: “Getrennt, bitte” – “Ayrı-ayrılıqda, zəhmət olmasa”.

Səadət Əlizadə