Arıqlama dərmanlarından istifadə edən insanların qidalanma vərdişlərini dəyişdirməsi lazım ola bilər. Mütəxəssislər bildirirlər ki, bu dərmanlardan istifadə zamanı yalnız daha az yemək deyil, qəbul edilən qidanın keyfiyyətinə də diqqət yetirmək vacibdir.

GLP-1 qrupuna daxil olan dərmanlar, o cümlədən semaqlutid və tirzepatid, iştahanı azaltmağa kömək edir. İnsanlar bu dərmanları qəbul etdikdə əvvəlkindən daha az qida qəbul edə bilirlər. Bu isə orqanizmin ehtiyac duyduğu zülal, vitamin və digər qida maddələrinin kifayət qədər alınmaması riskini yarada bilər.

Mütəxəssislər belə dərmanlardan istifadə edən insanlara qida seçimində daha diqqətli olmağı tövsiyə edirlər. Kiçik porsiyalar qəbul edildiyi üçün qidanın mümkün qədər qidalı olması, xüsusilə də kifayət qədər zülal və lif ehtiva etməsi əhəmiyyətlidir.Zülal xüsusilə vacib hesab olunur. Çünki arıqlama zamanı yalnız yağ deyil, əzələ kütləsi də itirilə bilər. Kifayət qədər zülal qəbul etmək əzələlərin qorunmasına və bərpasına kömək edə bilər.

Araşdırmalar həmçinin göstərir ki, GLP-1 dərmanlarından istifadə edən bəzi insanlarda susuzlaşma müşahidə oluna bilər. Bunun səbəblərindən biri daha az qida və maye qəbul edilməsidir. Buna görə də gün ərzində kifayət qədər su içmək vacibdir.Mütəxəssislər hesab edirlər ki, arıqlama dərmanlarından istifadə zamanı əsas məqsəd sadəcə daha az yemək deyil, daha az miqdarda qidadan mümkün qədər çox faydalı qida maddəsi almaqdır.

Səkinəbəyim Cəfərova 

BBC XƏBƏR