Fransa nəfəsini tutub gözləyir: İndi nə olacaq?

Həftəsonu baş verən hadisələr müasir Fransa tarixində ictimai asayişin ən ciddi şəkildə pozulduğu hadisələrdən biri olub. Şənbə günü yarım milyondan çox insan artan həyat bahalılığına və keyfiyyətli dövlət təhsili də daxil olmaqla, əsas dövlət xidmətlərinə çıxışın getdikcə çətinləşməsinə etiraz edib.

Nümayişçilərin böyük əksəriyyəti dinc şəkildə aksiya keçirib. Lakin qara geyimli, maskalı fəalların və ictimai əmlaka zərər vuran qrupların ortaya çıxması ilə etirazlar zorakılığa çevrilib. Çevik polis qüvvələri izdihama gözyaşardıcı qaz və su şırnaqları ilə müdaxilə edib.

Fransada Prezident Emmanuel Makronun gərginliyi azaltmaq üçün ölkənin bəzi bölgələrində müvəqqəti komendant saatı elan edə biləcəyi, hətta fövqəladə vəziyyət rejiminə keçə biləcəyi barədə şayiələr yayılıb.

Lakin Makron bazar günü televiziya vasitəsilə xalqa müraciət edərək milli birliyə çağırış edib və zorakılıq hadisələrinə görə məsuliyyət daşıyanların cəzalandırılacağına əmin olmağa çalışıb. Makronun çıxışı konkret təkliflərə yer vermədiyi üçün sosial şəbəkələrdə və siyasi rəqibləri tərəfindən sərt tənqid olunub.

Fransalı rəsmilər qarşıdakı iki həftə ərzində bir qədər rahat nəfəs ala biləcəklərinə ümid edirlər. Şagirdlərin tətili bazar ertəsi başlayır. Lakin bir sıra həmkarlar ittifaqları və Makronun prezidentliyinin ilk dövründə - 2018-ci ildə başlayan və bir ildən çox davam edən etiraz aksiyaları təşkil etmiş, müxtəlif təbəqələri bir araya gətirən “sarı jiletlilər” hərəkatı noyabrın 5-də genişmiqyaslı etiraz aksiyaları keçirəcəklərini açıqlayıblar.

Aysun Xəlilova