Hökumət məktəblərə və digər obyektlərə vurulan zərərə görə ailə müavinətlərinin azaldılmasını nəzərdə tutan qanun layihəsi hazırlayacağını açıqlayarkən, günün sonuna qədər 400-dən çox məktəbdə tədris prosesi pozulub.

Fransanın şimalında 15 yaşlı şagird bazar ertəsi keçirilən etiraz aksiyası zamanı əlindən ağır xəsarət alıb. Hadisə ölkə üzrə etirazların keçirilməsinə bir gün qalmış yüzlərlə məktəbdə fəaliyyətin pozulduğu vaxt baş verib.

Polis həmkarlar ittifaqındakı mənbənin sözlərinə görə, Lens şəhərində hadisə zamanı şagirdin çevik polis tərəfindən atılan səs-küy qumbarasına bənzər xüsusi qumbaranı götürərək geri atmağa çalışdığı ehtimal olunur. Lakin qurğu onun əlində partlayıb.

Şagirdlər siniflərdə şagird sayının çoxluğu, müəllim çatışmazlığı və məktəb binalarının yararsız vəziyyətdə olması ilə bağlı etiraz edirlər. Çərşənbə axşamı keçiriləcək ümummilli aksiya lisey şagirdlərini təmsil edən Union syndicale lycéenne (USL) tərəfindən təşkil olunub.

Etirazlardan təsirlənən məktəblər arasında Parisin 13-cü rayonunda yerləşən Voklen orta məktəbi də olub. Məktəbin direktoru Karol Zerbibin sözlərinə görə, “təxminən on nəfər kapüşonlu və maskalı gənc” məktəbin girişinə yaxınlaşıb.

O, Fransanın BFMTV telekanalına bildirib ki, həmin şəxslər məktəbin girişinə zibil qutuları və alışa bilən əşyalar gətirib, daha sonra isə onları yandırıblar.

Euronews

Zəri Bayramlı