Gənclərdə minimalizm trendi

Minimalist həyat tərzi xüsusilə gənclər arasında geniş yayılmağa başlayıb. Lazımsız əşyalardan, emosional yükdən və zaman itkisindən uzaq durmaq istəyən gənclər daha sadə, balanslı və stresssiz həyat axtarır. Bu yanaşma həm maddi, həm psixoloji, həm də sosial baxımdan yeni prioritetlər formalaşdırır.

Mövzu ilə bağlı psixoloq Zeynəb Əliyeva "İnformator.az" saytına açıqlamasında bildirib ki, minimalizm gənclər üçün rahatlıq təşkil edən bir alətdir:

"Gənclərin minimalizmə yönəlməsinin əsas səbəblərindən biri informasiya yükünün, sosial müqayisələrin və istehlak təzyiqinin artmasıdır. Müasir gənclər davamlı olaraq sosial şəbəkələrdə “daha çox şeyə sahib ol” mesajları ilə qarşılaşırlar və bu da həm psixoloji yorğunluq, həm də kimlik qarışıqlığı yaradır. Minimalizm isə onlara sadəlik, nəzarət və “həqiqətən özümə aid olanı seçmək” hissi verir. Bundan başqa, iqtisadi çətinliklər, davamlı qiymət artımları və gənclərin maliyyə sabitliyi ilə bağlı narahatlıqları minimalist düşüncəni daha cazibədar edir.

Minimalist həyat tərzi gündəlik qərarları sadələşdirir və insanın diqqətini daha dəyərli fəaliyyətlərə yönəldir. Maddi əşyaları azaltmaq emosional qərarların sayını da azaldır: nə geyinim, nə alım, nəyə pul xərcləyim kimi suallar daha az vaxt və enerji alır. Xərcləmə vərdişlərində isə impulsiv alışların azalması, daha məqsədli xərcləmələr və ehtiyac–istək fərqinin daha aydınlaşması müşahidə olunur. İnsan “çox” arxasınca qaçmaqdansa, “lazım olan”ı seçməyi öyrənir, bu da həm büdcəni, həm də zehni rahatlığı qoruyur.

Minimalizmin uzunmüddətli sosial və psixoloji nəticələri həm müsbət, həm də balans tələb edən tərəflərə malikdir. Müsbət cəhət kimi minimalizm insanı daha az stresli, daha fokuslanmış və emosional olaraq daha sabit edə bilər. Az əşya və az sosial təzyiq, daha çox daxili rahatlıq və özünüdərk deməkdir. İnsan prioritetlərini daha yaxşı müəyyən edir və digərlərinin gözləntiləri ilə yox, öz dəyərləri ilə yaşayır. Sosial müstəvidə minimalizm icma hissini gücləndirə, insanların real əlaqələr qurmasına kömək edə bilər. Lakin həddindən artıq minimalizm bəzən sosial təcridə, mükəmməllikçi “sadelik təzyiqinə” və ya özünə qarşı sərt gözləntilərə səbəb ola bilər. Buna görə də ən sağlam variant minimalizmi həyat keyfiyyətini artıran, lakin sərt qaydaya çevrilməyən bir yanaşma kimi qorumaqdır.

Ümumilikdə, minimalizm gənclər için həm psixoloji rahatlıq, həm də daha dəyərli seçimlər etməyə imkan yaradan bir alətdir".

Ayisə Şərifova