İraqdan PKK açıqlaması: Türkiyə ilə yüksək səviyyəli koordinasiya

İraq hökuməti terror təşkilatı PKK-nın ölkə ərazisindən çıxarılması üçün Türkiyə ilə yüksək səviyyəli koordinasiya həyata keçirildiyini açıqlayıb. Bağdad rəhbərliyi İraq torpaqlarının qonşu ölkələrə qarşı hər hansı təhdid məqsədilə istifadə edilməsinə icazə verilməyəcəyini vurğulayıb.

İraq Hökumətinin Sözçüsü Heydər Abbudi ölkənin rəsmi xəbər agentliyi INA-ya açıqlamasında Bağdad rəhbərliyinin sərhəd təhlükəsizliyi və qonşu ölkələrlə apardığı əməkdaşlıqla bağlı mühüm mesajlar verib. İraqın bölgə ölkələrinin təhlükəsizliyini təhdid edən fəaliyyətlərə qarşı mövqeyinin açıq olduğunu bildirən Abbudi, ölkə ərazisinin digər dövlətlərə qarşı hücum və ya təhdid məqsədilə istifadə olunmasına yol verilməyəcəyini ifadə edib.

Terror təşkilatı PKK-nın İraqdakı mövcudluğu ilə bağlı qiymətləndirmələr aparan Abbudi təşkilatın ölkədən çıxarılması və məsələnin həll edilməsi məqsədilə Türkiyə ilə yüksək səviyyəli koordinasiya təmin edildiyini bildirib. Bağdad rəhbərliyinin PKK məsələsi ilə bağlı işlərini Ankara ilə əməkdaşlıq çərçivəsində davam etdirdiyini qeyd edən Abbudi iki ölkə arasındakı təmasların davam etdiyini vurğulayıb.

İraq torpaqlarında Husilərə məxsus qərargahların olması yönündəki iddialara da toxunan Abbudi sözügedən iddiaların həqiqəti əks etdirmədiyini bildirib. İraqın qonşuları ilə münasibətlərində təhlükəsizlik və sabitliyi ön planda tutduğunu qeyd edən hökumət sözçüsü, ölkənin başqa dövlətlərə qarşı təhdid yaradacaq fəaliyyətlərə ev sahibliyi etməsinə icazə verilməyəcəyinin altını çəkib.

Abbudi həmçinin İraqda olan iranlı kürd silahlı qrupların vəziyyəti ilə bağlı da açıqlamalar verib. Sözügedən qruplarla bağlı problemlərin həlli üçün İran rəhbərliyi ilə yüksək səviyyəli koordinasiya aparıldığını qeyd edən Abbudi, bu çərçivədə iki ölkə arasında ortaq komitə yaradıldığını bildirib.

CNN Türk

Aynur Əhmədli