İstanbul Birjası günü geriləmə ilə başa vurub

İstanbul Birjasında BIST 100 indeksi günü 0,24 faiz geriləmə ilə 14 575,51 bənd səviyyəsində başa vurub.

İndeks əvvəlki bağlanışla müqayisədə 35,41 bənd azalıb. Gün ərzində birjada ümumi ticarət dövriyyəsi 180,7 milyard türk lirəsi təşkil edib.

Bankçılıq indeksi 0,07 faiz, holdinq indeksi isə 0,43 faiz dəyər itirib. Sektor indeksləri arasında ən çox qazandıran 2,07 faizlə idman, ən çox geriləyən isə 9,22 faizlə maliyyə lizinqi və faktorinq sektoru olub.

Qlobal bazarlarda ABŞ-nin çip istehsalçısı Nvidia-nın gözləntiləri üstələyən maliyyə nəticələri texnologiya səhmlərinə marağı artırıb. Bununla yanaşı, ABŞ-də davam edən inflyasiya narahatlıqları və Federal Ehtiyat Sisteminin (FED) sədri Kevin Uorşun Cekson-Houldakı çıxışı öncəsi bazarlarda qarışıq dinamika müşahidə olunur.

İstanbul Birjasında BIST 100 indeksi də Avropa birjalarındakı mənfi dinamikanın təsiri ilə günü satışların üstünlüyü şəraitində başa vurub.

Analitiklərin sözlərinə görə, sabah Türkiyədə iqtisadi inam indeksi və xarici ticarət balansı açıqlanacaq. Xarici bazarlarda isə Yaponiyada Tokio inflyasiyası, Almaniyada işsizlik səviyyəsi, Avrozonada iqtisadi inam indeksi, ABŞ-də isə Miçiqan Universitetinin istehlakçı inam indeksi və inflyasiya gözləntiləri diqqətdə olacaq.

Texniki baxımdan BIST 100 indeksində 14 500 və 14 400 bənd dəstək, 14 700 və 14 800 bənd isə müqavimət səviyyələri kimi qiymətləndirilir.

Nuray Əliyeva