Kanada gömrük rüsumlarını yumşaldır

Kanada, ABŞ ilə ticarət danışıqlarını canlandırmaq məqsədilə bir sıra Amerika mallarına tətbiq olunan cavab rüsumlarını aradan qaldırmaq qərarına gəlib. Bu barədə məlumatı mənbələr jurnalistlərə açıqlayıb.

Məlumata görə, ABŞ-dən idxal olunan avtomobil, polad və alüminium məhsullarına qoyulan rüsumlar hələlik qüvvədə qalacaq. Baş nazir Mark Karney bu qərarı gün ərzində keçiriləcək mətbuat konfransında rəsmi şəkildə elan edəcək.

Xəbərin yayılmasından sonra Kanada dolları möhkəmlənib. Günorta saatlarında Kanada dolları 0,5% artaraq ABŞ dollarına qarşı 1,3837 səviyyəsinə (72,27 ABŞ senti) yüksəlib.

Ottava aylardır Vaşinqtonla yeni iqtisadi və təhlükəsizlik çərçivəsi üzərində danışıqlar aparır. Lakin tərəflər hələ də razılaşmadan uzaqdırlar.

Baş nazir Karney cümə axşamı ABŞ Prezidenti Donald Tramp ilə telefon danışığı aparıb. Onun ofisi söhbəti “səmərəli” adlandırsa da, yaxın günlərdə veriləcək açıqlamalar barədə əlavə şərh verməyib.

ANEWZ 

Güllər Gülhüseynova