Əməkdar mədəniyyət işçisi, tanınan tarzən Fərhad Paşayevin əziz xatirəsinə

Əməkdar mədəniyyət işçisi, tanınmış tarzən, Ağdamın “Şur” ansamblının bədii rəhbəri Fərhad Paşayev vəfat edib. Bu barədə Əməkdar jurnalist Səadət Məmmədova məlumat verib.

Fərhad Paşayev 1958-ci ildə Ağdam rayonunda anadan olub. O, uşaqlıq illərindən musiqiyə böyük maraq göstərib və tarzən kimi formalaşaraq Azərbaycan xalq musiqisinin tanınmış ifaçılarından birinə çevrilib. Gənc yaşlarından etibarən müxtəlif musiqi kollektivlərində çıxış edən sənətkar, sonradan Ağdam Dövlət Dram Teatrının və “Şur” ansamblının tərkibində uzun illər fəaliyyət göstərib. Peşəkar tarzən kimi təkcə Azərbaycanda deyil, bir çox xarici ölkələrdə də konsert proqramlarında çıxış edib. Onun ifa tərzi muğam ənənələrinin qorunması və gənc nəsillərə ötürülməsi baxımından yüksək qiymətləndirilib.

Fərhad Paşayevin vəfatı Azərbaycan musiqi ictimaiyyəti üçün böyük itki sayılır. Onun xatirəsi sənətsevərlərin yaddaşında peşəkar ifaçı, dəyərli müəllim və sadiq sənət adamı kimi qalacaq.

Aişə Mustafayeva