Nadir xəstəlikli oğlan həkimləri heyrətə salıb

Kaliforniyadan olan 3 yaşlı Oliver Chu nadir genetik xəstəlik - Hunter sindromu (MPS II) diaqnozu alıb. Bu xəstəlik zamanla beynə və orqanlara zərər vurur və ən ağır hallarda xəstələr 20 yaşadək yaşaya bilmir.

Manchester Kral Uşaq Xəstəxanasının həkimləri Oliverdən götürülmüş kök hüceyrələri laboratoriyada dəyişdirib və orqanizmin lazım olan IDS fermentini istehsal etməsinə imkan verən gen terapiyası tətbiq edib. Müalicə bir dəfəlik həyata keçib.

Terapiyadan bir il sonra Oliver normal inkişaf edib, nitqi və motor bacarıqları irəliləyib, həftəlik bahalı dərman istifadəsi dayandırılıb. Professor Simon Jones nəticələri tarixi addım kimi qiymətləndirib.

Oliverin ailəsi “möcüzə kimi dəyişiklik” gördüyünü bildirir və eyni müalicənin onun qardaşı Skyler üçün də həyata keçməsini gözləyir. Layihə LifeArc fondunun maliyyə dəstəyi ilə davam edir və daha dörd uşağın müalicə prosesi başlayıb.

BBC
Reyhan Quliyeva