“Netflix-in 72 milyardlıq addımı”

Netflix Warner Bros Discovery-nin film və yayım bölməsini 72 milyard dollara almaq barədə razılıq əldə edib. Bu, Hollivudda böyük dəyişiklik yaratmaq potensialına malikdir.

Şirkət bu satınalma ilə Comcast və Paramount Skydance-i geridə qoyub. Warner Bros-un Harry Potter, Game of Thrones kimi məşhur layihələri və HBO Max platforması Netflix-ə keçəcək. Razılaşma rəqabət qurumlarının təsdiqindən sonra tamamlanacaq.

Netflix-in həmtəsisçisi Ted Sarandos şirkətin təsdiq alacağına “tam əmin” olduqlarını bildirib. O deyib ki, Warner Bros-un yüz illik kino irsi ilə Netflix-in orijinal layihələrinin birləşməsi gələcək dövrün hekayəçiliyinə yön verəcək.

Netflix, Warner Bros-un filmlərinin kinoteatrlarda nümayişinin davam edəcəyini və studiyanın üçüncü tərəflər üçün kontent istehsal edə biləcəyini açıqlayıb. Netflix isə öz platforması üçün eksklüziv layihələri artırmağı planlaşdırır.

Razılaşmanın ümumi dəyəri borclar daxil olmaqla 82,7 milyard dollardır. Hər iki şirkətin direktorlar şurası satınalmanı təsdiqləyib.

Analitiklər bu addımın Netflix-i qlobal bazarda daha güclü edəcəyini desə də, studiyaların birləşməsi və kontent azalmaları ilə bağlı narahatlıqlar mövcuddur. Ekspertlər qiymət artımı ehtimalını da istisna etmir.

Directors Guild of America razılaşma ilə bağlı “ciddi narahatlıq” ifadə edib.

BBC
Reyhan Quliyeva