Norveçdəki ada indi şəhər həyatından uzaqlaşmaq istəyənləri cəlb edir
Bəzən uzaq bir yerə getmək üçün xüsusi səbəb axtarmağa ehtiyac olmur. Sadəcə bir müddət səs-küydən uzaq qalmaq, dənizə baxmaq və heç yerə tələsməmək kifayət edir.
Norveçin Arktik dairənin şimalında yerləşən kiçik Støtt adası da məhz belə məkanlardan biridir. Əsrlər əvvəl güclü dəniz fırtınalarından qaçan balıqçıların üz tutduğu ada bu gün müasir həyatın sürətindən uzaqlaşmaq istəyən turistləri qəbul edir.
Støtt üç məskunlaşmış kiçik adadan ibarət arxipelaqdır. Bir vaxtlar Norveçin şimalındakı balıqçılıq marşrutlarının mühüm dayanacaqlarından biri olub. Qış aylarında Lofoten adalarına Arktika treskası ovlamağa gedən balıqçılar burada dayanır, ərzaq və avadanlıq alır, hava sakitləşənə qədər dincəlirdilər.
Adanın bu keçmişini bu gün də yaşadan əsas məkanlardan biri Støtt Brygge otelidir. Bura 1897-ci ildən Eva Ann Andersenin ailəsinə məxsusdur.
Andersen özü də Støttda böyüyüb. Daha sonra Osloya köçərək beynəlxalq şirkətlərdə işləyib. Lakin illər sonra şəhər həyatının tempindən yorularaq 2011-ci ildə doğma adasına qayıdıb.
Onun qayıdışı Støtt üçün yeni başlanğıc olub. Andersen adanın keçmişini qorumaqla yanaşı, buraya yeni həyat gətirməyə çalışıb. Vaxtilə balıqçılar üçün istifadə olunan binalar bərpa edilərək otelə çevrilib. Köhnə çörəkxana, balıqçı evləri və anbarlar indi qonaqlar üçün yaşayış məkanlarıdır. Oteldə yaradılan kiçik muzeydə isə Støttun balıqçılıq tarixindən fotoşəkillər və köhnə əşyalar nümayiş olunur.
Ancaq adanın həyatı illər ərzində xeyli dəyişib. Balıqçılıq sənayesində texnologiyanın inkişafı və daha böyük gəmilərin istifadəyə verilməsi kiçik dayanacaqlara ehtiyacı azaldıb. Bunun nəticəsində Støttun əhalisi də tədricən azalıb. Bir vaxtlar təxminən 120 nəfərin yaşadığı adada bu gün 25-ə yaxın daimi sakin qalır.Andersen isə adanın yenidən canlanacağına inanır.
Bu məqsədlə Støttda turizm imkanları genişləndirilir. Buraya gələnlər kayakla gəzintiyə çıxa, qayıqla Svartisen buzlağına gedə, quşları müşahidə edə, Şimal işıqlarını izləyə və İkinci Dünya müharibəsindən qalma bunkerləri araşdıra bilərlər.
Støttun təbiəti isə ayrıca diqqət çəkir. Yay aylarında burada günəş uzun müddət batmır. Qışda isə səmanı Şimal işıqları bürüyür. Qayalı sahillər, soyuq dəniz, dağlar və kiçik qırmızı evlər adaya özünəməxsus mənzərə verir.
Adada turizmin inkişaf etdirilməsi yalnız ziyarətçi sayını artırmaq məqsədi daşımır. Andersen yeni iş yerləri yaratmaq və insanların adada qalmasına şərait formalaşdırmaq istəyir. O, hətta köhnə balıq fabrikini turistlər üçün yaşayış məkanına çevirməyi planlaşdırır.
Beləliklə, Støttun “sığınacaq” hekayəsi illər keçsə də dəyişməyib.
Əvvəllər balıqçılar burada dənizin sərtliyindən qorunurdu. İndi isə insanlar başqa bir fırtınadan – şəhər həyatının tələskənliyindən uzaqlaşmaq üçün bu adaya gəlirlər.
Bəlkə də Støttun ən böyük cazibəsi elə budur: burada həyatın sürətini bir az azaltmaq mümkündür.
Fatimə Hüseynova
