Qənirə Paşayeva

"İnformator.az" xəbər verir ki, bu gün Azərbaycan ictimai-siyasi həyatında, jurnalistikada və humanitar sahədə dərin iz qoyan Qənirə Paşayevanın vəfatının il dönümüdür.

Onun gedişi təkcə bir ailənin deyil, bütöv bir millətin itkisiydi. Qənirə xanım Azərbaycan xanımının gücünü, mərhəmətini və cəsarətini öz şəxsiyyətində birləşdirən nadir insanlardan biri idi.

Qənirə Paşayeva millət vəkili, jurnalist, yazar, ziyalı, həm də sadəcə insanların dərdini dinləyən bir dost kimi yadda qaldı. O, sözün həqiqi mənasında xalqın içindən çıxan, xalq üçün yaşayan və xalqla nəfəs alan bir şəxs idi. Onun çıxışlarında, yazılarında və təşəbbüslərində bir amal vardı- Azərbaycanı, milli kimliyimizi, mədəniyyətimizi və insanımızı sevmək.

O, daim qadınların təhsilinə, gənclərin inkişafına və mədəni irsimizin qorunmasına dəstək olurdu. Qənirə xanımın səsi tribunadan ucalanda sanki bir millətin səsi idi- səmimi, güclü, ədalətli. O səs indi susub, amma onun dedikləri, müdafiə etdiyi dəyərlər, insanlara etdiyi xeyirxahlıqlar hələ də yaşayır.

Bu gün onu yad edən hər kəsin qəlbində eyni hiss var: dərin hörmət və sonsuz minnətdarlıq. Çünki Qənirə Paşayeva təkcə bir ad deyil, bir örnəkdir- vicdanla, mərhəmətlə, sevgi ilə yaşamağın örnəyi.

Ruhu şad, xatirəsi əbədi olsun.

O, danışmasa da, ruhu hələ də danışır- insanlıq, mərhəmət və Vətən dili ilə…

Banuçiçək Məmmədova