Qərbi Londondakı məktəbdə Avropanın ən nadir borulu orqanlarından biri saxlanılır

Qərbi Londonda yerləşən Sacred Heart High School-da saxlanılan nadir borulu orqanın Avropanın ən qiymətli musiqi alətlərindən biri olduğu müəyyən edilib. Uzun illər məktəbin Grade II* statuslu kapellasına aid hesab edilən alətin əslində XIX əsrdə Belçikalı məşhur ustad Hippolyte Loretin Fransada hazırladığı üzə çıxıb.

Araşdırmalar göstərib ki, orqan 160 ildən çox əvvəl Parisdə Müqəddəs Qəlb Cəmiyyətinə məxsus məktəb kapellası üçün hazırlanıb. XX əsrin əvvəllərində Fransada dini qurumlara qarşı aparılan siyasət nəticəsində monastırların bağlanması və əmlakların müsadirəsi təhlükəsi yaranıb. Bu səbəbdən cəmiyyətin rəhbəri Mother Mabel Digby 1904-cü ildə orqanın gizli şəkildə sökülərək Londona göndərilməsinə nail olub. Alət həmin il Hammersmithdəki Sacred Heart kapellasında yenidən quraşdırılıb.

Mütəxəssislərin fikrincə, bu, Böyük Britaniyada Loretin hazırladığı yeganə borulu orqandır və Avropa miqyasında son dərəcə nadir nümunə hesab olunur. Hazırda alətin ciddi bərpaya ehtiyacı var. Məktəb rəhbərliyi orqanın sökülməsi, təmiri və yenidən quraşdırılması üçün 257 min funt sterlinq vəsait toplamaq məqsədilə ianə kampaniyasına başlayıb. Bərpa işləri başa çatdıqdan sonra orqanın konsert və musiqi tədbirlərində istifadəsi planlaşdırılır.

BBC
Reyhan Quliyeva