Rəqəmsal kontentdə dönüş nöqtəsi: Süni intellekt yenilikləri

Süni intellektlə hazırlanan yeni foto və audiomateriallarla bağlı yeni tələblər müəyyənləşib. Bundan sonra süni intellektlə bağlı bu tələblərə riayət etməyənlər azadlıqdan məhrum edilə və ya ən yaxşı halda cərimələnə bilər.

Mövzu ilə bağlı “İnformator.az”a açıqlamasına İT mütəxəssisi Elvin Abbasov bildirib ki, süni intellektlə yaradılan kontentləri müəyyən etmək üçün Microsoft Video Authenticator və ya Intel-in FakeCatcher kimi qabaqcıl detektorlar tətbiq edilir:

“Bu alətlər videodakı piksel uyğunsuzluqlarını, işıq-kölgə anomaliyalarını və insanın göz qırpma tezliyi kimi bioloji əlamətləri analiz edərək saxtakarlığı aşkar edir. Beynəlxalq şirkətlərlə qurulan sıx ünsiyyət və əməkdaşlıq çərçivəsində rəqəmsal su nişanlanması və blokçeyn əsaslı kontent təsdiqləmə sistemləri də inkişaf etdirilir. İstifadəçilər bu texnologiyalardan yararlanarkən başqasının hüquqlarını pozmamaq üçün etik sərhədləri qorumalı və yaratdıqları materialın süni intellekt məhsulu olduğunu şəffaf şəkildə qeyd etməlidirlər, çünki bu tələblərin pozulması artıq ciddi cərimələr və hüquqi məsuliyyət yaradır.
Gələcəkdə süni intellekt sahəsində ən böyük risk "həqiqətin aşınması" və kütləvi dezinformasiya hücumları olsa da, bu texnologiya tibb, təhsil və iqtisadi səmərəlilik sahəsində misilsiz imkanlar vəd edir. Vətəndaş məsuliyyəti və rəqəmsal savadlılıq bu risklərin qarşısını almaqda ən mühüm amildir. Hər bir fərd qarşılaşdığı materialı bir neçə mənbədən yoxlamalı və fərdi səs və ya foto nümunələrini şübhəli platformalarda paylaşmaqdan çəkinməlidir. Bu sahədə tətbiq edilən yeni qanunvericilik tələbləri həm rəqəmsal innovasiyaları təşviq etməyə, həm də sui-istifadə hallarına qarşı möhkəm hüquqi sipər formalaşdırmağa yönəlib".

Səadət Əlizadə