“Resident Evil” rejissoru pərəstişkarların reaksiyasına hazır olmadığını deyib

Dünyanın ən məşhur qorxu videooyun seriyasını planetin ən populyar qorxu rejissorlarından birinin ekranlaşdırması ilk baxışdan ideal seçim kimi görünürdü.

Zach Cregger “Weapons” və “Barbarian” kimi qorxu filmlərindəki orijinal və yaradıcı işi ilə geniş rəğbət qazanıb. O, eyni zamanda uzun illərdir “Resident Evil” videooyun seriyasının pərəstişkarıdır.

Lakin filmin nümayişinə qədər Cregger “Resident Evil” adından kommersiya məqsədilə istifadə etdiyi barədə iradlara dəfələrlə cavab verməli olub.

Rejissor BBC Newsbeat-ə açıqlamasında qarşılaşdığı reaksiyalara “hazır olmadığını” deyib.

1996

Yaponiyanın Capcom şirkəti tərəfindən 1996-cı ildə ilk Sony PlayStation üçün hazırlanan “Resident Evil” böyük uğur qazandı.

1990-cı illərdəki bir çox videooyundan fərqli olaraq, oyunçular burada fövqəladə güclərə malik qəhrəmanları idarə etmirdilər. Əksinə, məhdud resurslardan istifadə edərək sağ qalmağa çalışırdılar.

Seriya yenilənmiş versiyalar və remeyklər sayəsində aktuallığını qoruyub. İlk təqdim olunduğu vaxtdan indiyədək oyunların ümumilikdə 213 milyon nüsxəsi satılıb.

Seriyanın bəzi personajları videooyun dünyasının ən tanınmış obrazları sırasındadır. Onların yer aldığı kainatın süjet xəttini və tarixçəsini müzakirə edən böyük fan icmaları da mövcuddur.

Creggerin “Resident Evil” filmi isə orijinal personaj olan Brayanın hekayəsindən bəhs edir. Obrazı rejissorun “Weapons” filmində də birlikdə çalışdığı Austin Abrams canlandırır.

Brayan Rakkun-Sitidəki xəstəxanaya bağlama çatdırmağa razı olan kuryerdir. Rakkun-Siti oyun seriyasının əsas məkanlarından biridir.

Brayan bağlamanı çatdırmaq üçün yola çıxdıqca onun hansısa virusun yaratdığı epidemiyanın ortasında qaldığı məlum olur. Virusa yoluxan insanlar isə dəhşətli məxluqlara çevrilirlər.

İlk treyler internetdə yayımlandıqdan sonra çoxsaylı istifadəçilər şərh bölmələrində gördüklərindən narazılıqlarını bildiriblər.

Pərəstişkarların sevdiyi personajlar haradadır? Bəs tanış məxluqlar?

Cregger deyir ki, “Resident Evil” oyunlarının hekayəsini olduğu kimi yenidən danışmaq niyyətində olmayıb. Lakin bu yanaşma bəzi fanların narazılığını aradan qaldırmayıb.

“Məncə, sadəlövh davranmışam”, – deyə rejissor bildirib.

“Düşünürdüm ki, insanlar oyunların ruhunu əks etdirən ‘Resident Evil’ filmini görməkdən məmnun olacaqlar.

Mənim məqsədim oyunları oynamaq təcrübəsinə həqiqətən hörmət edən bir film çəkmək idi”.

Tənqidçilərin əksəriyyətinin rəylərinə əsasən, Cregger qarşısına qoyduğu məqsədə nail olub.

NME üç ulduzlu rəyində filmin “videooyun əsasında çəkilmiş ilk möhtəşəm qorxu filmi” olub-olmadığını soruşub.

“Filmin böyük bir hissəsi üçün cavab qəti şəkildə bəlidir”, – deyə tənqidçi Jordan Bassett yazıb. O, eyni zamanda filmin gedişində Brayanın qarşılaşmalarının təkrarlanan xarakter aldığını qeyd edib.

“The Jam Report”dan Doug Jamieson filmə dörd ulduz verərək Creggerin “ekranlaşdırmanı təqlid deyil, tərcümə kimi başa düşdüyünü” bildirib.

Looper nəşrinin tənqidçisi Alastair Ryder isə filmə 10 üzərindən 8 bal verərək yazıb: “Zach Cregger videooyun oynamaq təcrübəsini kinoya köçürmək və onu kinematoqrafik hiss etdirmək baxımından gördüyüm ən yaxşı işi ortaya qoyub”.

Filmin fanlar tərəfindən necə qarşılanacağı isə hələ məlum deyil. Bununla belə, “Resident Evil”in kinoteatrlarda ilk həftəsonunda uğurlu nəticə göstərəcəyi gözlənilir.

Film son dövrlərdə ekranlaşdırılan “Minecraft” və “Super Mario Bros.” kimi videooyun layihələrinin ardınca gəlir. Həmin filmlər tənqidçilərdən zəif rəylər alsa da, tamaşaçılar arasında böyük populyarlıq qazanıb.

Bu, “Resident Evil”in ilk ekranlaşdırılması deyil. Seriyanın ilk filmi 2002-ci ildə kinoteatrlara çıxıb və ssenarist-rejissor Paul W. S. Andersonun rəhbərliyi ilə çəkilən altı filmdən birincisi olub.

Andersonun həyat yoldaşı Milla Jovovich bu filmlərin hər birində baş rolda çəkilib. Filmlər zamanla öz fan auditoriyasını qazansa da, tənqidçilər tərəfindən ciddi rəğbətlə qarşılanmayıb.

2021-ci ildə oyunlara daha çox əsaslanan “reboot” filmi və 2022-ci ildə Netflix-də yayımlanan serial da tamaşaçı və tənqidçilərin gözləntilərini doğrultmayıb.

“Resident Evil”in canlı çəkiliş hüquqları Almaniyanın Constantin Film şirkətinə məxsusdur. Pərəstişkarların bir qismi əvvəlki ekranlaşdırmaların aşağı keyfiyyətini məhz bununla əlaqələndirir.

İnternetdə yayılan məlumatlara görə, Constantin Film ilə Capcom arasındakı razılaşma şirkətə filmləri oyunlardakı hadisələrlə eyni zaman xəttində yerləşdirməyə imkan vermir.

Cregger Newsbeat-ə bildirib ki, filmin hazırlanması zamanı oyunların yaradıcısı Capcom ilə heç bir əlaqəsi olmayıb.

“Capcom-dan heç kim heç vaxt mənimlə əlaqə saxlamayıb. Heç bir şəkildə”, – deyə o bildirib.

Constantin Film bu barədə açıqlama verməkdən imtina edib. Lakin BBC Newsbeat-ə verilən məlumata görə, arxa planda oyun şirkəti ilə filmin prodüserləri arasında müəyyən koordinasiya aparılıb.

Cregger hesab edir ki, hamını razı salmaq “yəqin ki, mümkün deyil”. O, eyni zamanda oyunu ekranda olduğu kimi yenidən yaratmaq niyyətində olmadığını vurğulayıb.

“Əgər oyunlardakı hekayələrdən birini olduğu kimi ekrana köçürsəydim, düşünürəm ki, həmin insanlar yenə məndən narazı qalardılar.

Çünki istər-istəməz nəyisə səhv edərdim.

Ona görə də edə biləcəyim yeganə şey ən yaxşı hekayə olduğuna inandığım hekayəni danışmaqdır.

Əgər kimsə filmin onun təsəvvüründəki ‘Resident Evil’ filminə tam uyğun gəlməsindən narazıdırsa, buna deyəcək sözüm yoxdur”.

Mənbə: BBC NEWS