Səmanı müşahidə etmək üçün ən əlverişli ay

Ulduzsevərə şad xəbər

 

Mülayim hava şəraiti və qaranlıq saatların artması sentyabrı səmanı müşahidə etmək üçün əlverişli dövrə çevirir. Bu il isə göy üzündə xüsusilə maraqlı mənzərələrin müşahidə olunacağı gözlənilir.

Ulduzları müşahidə etmək üçün sentyabrdan daha yaxşı ay tapmaq çətin ola bilər. Bu dövrdə isti axşamlar gecələrin sürətlə uzanması ilə üst-üstə düşür, Süd Yolu hələ də səmada aydın görünür və dəyişən fəsillər Şimal işıqlarını görmək şansını artıra bilər.

Şimal yarımkürəsində səmanı müşahidə edənlər üçün yayın əsas problemlərindən biri qaranlığın gec düşməsidir. Sentyabrda isə günəş əvvəlkindən daha tez batır. Bu da mülayim hava şəraitində qaranlıq səmanın altında daha çox vaxt keçirməyə imkan verir.

Gündüzlər hələ də yayı xatırlatsa da, gecələr ulduzları müşahidə etmək üçün saatlarla açıq havada qalmaq kifayət qədər rahat olur. Bunun üçün sadə astronomik durbin və ya həyətdə istifadə edilə bilən teleskopdan yararlanmaq mümkündür. Əsas çətinlik isə buludsuz səma tapmaqdır.

Gündüzlə gecə arasındakı nisbət payız bərabərliyi dövründə xüsusilə sürətlə dəyişir. Payız bərabərliyi 22 sentyabra təsadüf edir. Həmin gün Günəş Yerin ekvatorunu kəsir və dünyanın müxtəlif bölgələrində gündüzlə gecənin uzunluğu bir-birinə yaxınlaşır.

Bu tarixdən etibarən Şimal yarımkürəsində gecələr qış gündönümünə qədər, yəni 21 dekabra kimi gündüzlərdən daha uzun olur. Mənbə: Space.com