Seulda iki Michelin ulduzlu restoran qarışqalardan istifadə etdiyi üçün cərimələnib

Cənubi Koreyanın paytaxtı Seulda iki Michelin ulduzuna layiq görülmüş restoran desertlərin bəzədilməsində qarışqalardan istifadə etdiyi üçün cərimələnib.

“Evett” restoranının sahibi 15 milyon von, restoranı idarə edən şirkət isə 10 milyon von məbləğində cərimələnib. Buna səbəb qarışqaların qida məhsullarında istifadəsinin ölkənin Qida Sanitariyası haqqında qanununa zidd olmasıdır.

Cənubi Koreyada insanların qida kimi istifadəsinə icazə verilən 10 həşərat növü var. Qarışqalar həmin siyahıya daxil deyil. Siyahıda çəyirtkə, digər bəzi çəyirtkə növləri və ipəkqurdu kimi həşəratlar yer alır.

Restoranın sahibi qarışqaların istifadəsinin ölkədə qadağan olduğunu bilmədiyini bildirib. Onun sözlərinə görə, qarışqalar başqa ölkələrdə qida kimi istifadə edildiyi üçün bu məhsulun istifadəsinə icazə verildiyini düşünüb.

Qarışqalar restoranın bəzi sorbetlərinin üzərinə əlavə edilib. Restoran sahibi təxminən dörd il ərzində müəyyən yeməklərin üzərinə 3-5 qarışqa səpib. Bu müddətdə ümumilikdə təxminən 49 min qarışqadan istifadə edildiyi müəyyənləşib.

Qarışqaların böyük hissəsi ABŞ-dan, bir qismi isə Tailanddan gətirilib. Onlardan yeməyə turş dad vermək məqsədilə istifadə olunub.

Məsələ restoranın onlayn rəylərində yeməklərin fotolarının paylaşılmasından sonra üzə çıxıb. Qarışqalar laboratoriyada yoxlanılarkən onların tərkibində normadan artıq ağır metallar da aşkarlanıb.

Prokurorluq restoran sahibinə bir il həbs cəzası və 20 milyon von cərimə verilməsini istəyib. Lakin məhkəmə onun ittihamı qəbul etməsini və əvvəllər məhkumluğunun olmamasını nəzərə alaraq cərimə ilə kifayətlənib.

Restoran sahibi qarışqaların 15 yeməkdən ibarət menyunun yalnız müəyyən hissəsində istifadə edildiyini və müştərilərə qarışqasız alternativ təqdim olunduğunu bildirib.

Elmira Ağayeva