Süni intellekt savadlılığı e-Dövlət portalında ölçüləcək
Türkiyədə vətəndaşların süni intellekt sahəsində bilik və məlumatlılıq səviyyəsini müəyyənləşdirməsinə imkan verən yeni sistem istifadəyə veriləcək.
Sistem Türkiyənin Sənaye və Texnologiya Nazirliyinin koordinasiyası ilə həyata keçirilən 2026-2030-cu illəri əhatə edən “Türkiyə Süni İntellekt Fəaliyyət Planı” çərçivəsində hazırlanacaq.
Yeni qiymətləndirmə sistemi e-Dövlət portalına inteqrasiya ediləcək. Vətəndaşlar platforma vasitəsilə süni intellekt savadlılığı səviyyələrini müəyyənləşdirə biləcəklər.
Qiymətləndirmənin nəticələrinə əsasən istifadəçilər mövcud bilik səviyyələrinə və ehtiyaclarına uyğun təhsil proqramlarına yönləndiriləcək. Beləliklə, iştirakçılara başlanğıc səviyyəsindən irəli mərhələlərə qədər fərdi öyrənmə imkanı yaradılacaq.
Qiymətləndirmə sistemi istifadəyə veriləcək “Milli Süni İntellekt Savadlılığı Proqramı” ilə birlikdə fəaliyyət göstərəcək.
Proqramda iştirak üçün xüsusi texniki bilik tələb olunmayacaq və bütün vətəndaşlar üçün açıq olacaq. Təlimlərə ödənişsiz onlayn materiallar və əyani seminarlar daxil ediləcək.
Tədris materiallarına əsasən e-Dövlət və Təhsil İnformatika Şəbəkəsi (EBA) kimi mövcud rəqəmsal platformalar vasitəsilə çıxış mümkün olacaq. Əyani təlim və seminarların isə xalq kitabxanaları, icma mərkəzləri və digər məkanlarda keçirilməsi nəzərdə tutulur.
Proqram çərçivəsində uşaqlardan gənclərə, çalışanlardan yaşlı insanlara qədər cəmiyyətin müxtəlif təbəqələrinin süni intellektin yaratdığı imkanlar və mümkün risklər barədə məlumatlandırılması məqsəd qoyulub.
Təlimlər vasitəsilə vətəndaşların süni intellekt alətlərindən gündəlik həyatda təhlükəsiz, məsuliyyətli və səmərəli istifadə etmələri üçün lazımi əsas bilik və bacarıqların formalaşdırılması hədəflənir.
Bundan əlavə, hər il “Milli Süni İntellekt Həftəsi”nin keçirilməsi və bu sahədə maarifləndirmə işlərinin ölkə səviyyəsində gücləndirilməsi planlaşdırılır.
Nuray Əliyeva
