Tez-tez çökən yollar: Sürücülər üçün görünməyən təhlükə
Son dövrlərdə müxtəlif ərazilərdə yolların tez-tez çökməsi ciddi narahatlıq doğurur. İnfrastrukturun keyfiyyətsiz qurulması, köhnəlmiş kommunikasiya xətləri və düzgün aparılmayan təmir işləri bu problemlərin əsas səbəbləri kimi göstərilir. Yol səthində yaranan çökəkliklər nəqliyyat vasitələrinə ziyan vurmaqla yanaşı, qəza riskini də əhəmiyyətli dərəcədə artırır.
Mövzu ilə bağlı nəqliyyat eksperti Yasin Mustafayev “İnformator.az”a açıqlamasında bildirib ki, bu biraz böyük məsələdir:
“Geniş aspektdən yanaşmaq lazımdır. Burada əsas məsələ su hər yerdə həyat mənbəyidir. Bir problemdə var ki, yolun düşmənidir. Yağan yağışı və ya suvarma və s. Bunu tezliklə yoldan uzaqlaşdırmaq lazımdır. Çünki yolda qalarkən bu artıq fəsadlara gətirib çıxarır. Şişmələr, çökmələr yaranır, deformasiyalar yaranır. Buna görə də istər yağış, kanalizasiya, istərsə də suvarma sudur. Bunların hamısı yola düşürsə, axırsa, gəlirsə, bunları yoldan uzaqlaşdırmaq lazımdır. Bu məsələnin bir tərəfidir. İkinci isə, bu yolların çökməyinə səbəb olan amillərdən biri də mövcud kommunikasiya xətlərinin, su və ya kanalizasiya xətlərinin köhnəlməsidir. Burada əsas məsələ odur ki, çox yağıntı yağdığı zaman, əsasən də kanalizasiya sistemi bunu daşıya bilmir və ona görə də orada müəyyən yuyulmalar, müəyyən kanalizasiya xətlərində problemlər ortaya çıxır və bu da yolların çökməyinə səbəb olur. Burada bir də əsas məsələ su və kanalizasiya xətlərinin mövcud vəziyyətinin qənaətbəxş olmamasıdır. Bunların həlli üçün standartlar var. Əlbəttə, hər bir işin öz tələbləri, normaları, qaydaları var. Qaydalara uyğun həll olunmalıdır, xətlər yenilənməlidir. İndi Cənab Prezidentin yanvar ayında imzaladığı proqram var ki, hansı ki yağış sularının və kanalizasiya xətlərinin idarə olunması ilə bağlı dövlət proqramıdır. O proqramda artıq görüləcək işlərin ümumi konsepti müəyyən edilibdir. Amma detalları zaman-zaman formalaşdırılacaqdır. Bu istiqamətdə artıq həyəcan təbili çalınıb ki, bu problemlər öz həllini tapsın. Şəhərdə yağış yağanda yollarda su yığılan yerlər var, artıq məsələyə qlobal yanaşıb problemi həll etmək lazımdır. Mövcud kollektorlar, kanalizasiya sistemləri bu yükü götürə bilmir və daşımır”.
Cavahir Əsgərbəyli
